Uwiciye abasivile muri Liberia yatangiye kuburanishwa

Uwahoze ari umukuru w’inyeshyamba muri Liberia yatangiye kuburanishwa mu Busuwisi ku byaha ndengakamere ashinjwa ko yakoze mu ntambara yabaye muri Liberia.

Alieu Kosiah, w’imyaka 45, ashinjwa ubwicanyi, gufata abagore n’abakobwa ku ngufu, gushyira abana mu nyeshyamba n’ibindi byaha.

Uyu wahoze ari umukuru w’inyeshyamba, wahungiye mu Busuwisi nyuma akaza gutabwa muri yombi muri icyo gihugu mu mwaka wa 2014, ahakana ibyo aregwa.

Abantu bagera ku 250,000 biciwe mu ntambara zabaye muri Liberia, naho abandi babarirwa mu bihumbi bahunga imirwano.

Imirwano ikurikiranye yayogoje icyo gihugu cyo mu burengerazuba bw’Afurika hagati y’umwaka wa 1989 na 2003.

Uru rubanza rwatangiye mu Busuwisi ku wa kane, ni rwo rwa mbere ruburanishijwe hashingiwe ku itegeko ryashyizweho mu 2011 ryemerera kuburanisha ibyaha byo mu ntambara aho byaba byarakorewe aho ari ho hose ku isi.

Ni na bwo bwa mbere ibyaha byo mu ntambara biburanishijwe n’urukiko rwa gisivile rwo mu Busuwisi.

Ubusuwisi bwemera ihame ry’uko ubutabera butagira umupaka, bivuze ko abantu bacyekwaho gukora ibyaha byo ku rwego rwo hejuru mu bindi bihugu bashobora kuburanishwa n’inkiko zabwo.

Bwana Kosiah ni we munya-Liberia wa mbere uburanishijwe ku byaha byo mu ntambara, byo mu ntambara ya mbere yo muri icyo gihugu yabaye hagati ya 1989 na 1996, nkuko bivugwa n’umuryango uharanira uburenganzira bwa muntu Human Rights Watch.

Ariko, ntabwo yari mu bakomeye cyane mu nyeshyamba muri icyo gihe cy’intambara

Nta munya-Liberia wari wahamwa n’ibyaha byo muri iyo ntambara. Ariko, Charles Taylor, wahoze ari Perezida wa Liberia, we mu 2012 yahamwe no gukora ibyaha byo mu ntambara mu gihugu baturanye cya Sierra Leone.

 

Leave a Reply

Your email address will not be published. Required fields are marked *