Uwazanye covid Nyamagabe yamenyekanye

Kuva ku wa 16 Nzeri 2020 mu Karere ka Nyamagabe hongeye kugaragara ubwandu bw’icyorezo cya Coronavirus kandi hari hashize amezi abiri nta muntu kigaragaraho kuko cyahaherukaga hagati muri Nyakanga 2020.

Kongera kugaragara kwacyo muri Nyamagabe byatunguye bamwe mu baturage n’abayobozi bibaza aho kiri guturuka ndetse n’agace kibasiye ako ari ko.

Mu Karere ka Nyamagabe haherukaga ubwandu bwa Coronavirus ku itariki 17 Nyakanga 2020 ariko ku wa 16 Nzeri 2020 hongeye kugaragara umuntu umwe wanduye Coronavirus nk’uko imibare ya Minisiteri y’Ubuzima ibyerekana.

Bukeye bwaho ku wa 17 Nzeri 2020 hongeye kugaragara abantu batandatu bashya banduye Coronavirus, naho ku wa 18 haboneka bane; ku wa 19 hagaragara abandi bane mu gihe ku wa 20 habonetse abandi barindwi bacyanduye.

Ku wa 21 Nzeri 2020 muri Nyamagabe hagaragaye abandi bane bashya banduye Coronavirus naho ku wa 22 Nzeri hagaragaye abandi batanu banduye icyo cyorezo.

Umudugudu umwe ni wo wibasiwe

Mu kiganiro cyihariye yagiranye na IGIHE, Umuyobozi w’Akarere ka Nyamagabe, Uwamahoro Bonaventure, yavuze ko muri iki gihe ubwandu bushya buri kugaragara mu Mudugudu wa Baro wo mu Kagari ka Rususa mu Murenge wa Kamegeri.

Ati “Mu Mudugudu witwa Baro hari agasantere k’ubucuruzi ni ho ubu bwandu buri kugaragara kandi naho twashyizeho ingamba zo gukurikirana, cyane cyane gukurikirana abantu bahuye n’abagaragayeho ubwandu.”

Yasobanuye ko mu Mudugudu wa Baro hamaze gupimwa Coronavirus abantu 1007 muri bo abarenga 30 bakaba bagaragayeho ubwandu, bityo hashyizweho ingamba zo kuwurinda kugira ngo abantu bawutuyemo bareke kugendagenda cyane birinda kwanduzanya.

Harakekwa umuntu watorotse i Kigali

Meya Uwamahoro yasobanuye ko ubwandu bushya bwa Coronavirus bwageze mu Karere ka Nyamagabe bushobora kuba bwaraturutse ku muntu wavuye i Kigali atorotse mu gace kari karashyizwe muri gahunda ya Guma mu Rugo.

Ati “Dufatanyije n’inzego z’ubuzima turacyakurikirana aho byaturutse, kugira ngo ubundi tujye kubimenya ko hari ubwandu, twapimye abakozi bose b’akarere. Muri abo bakozi twaje kubonamo umwe uba mu Murenge wa Kamegeri; turamukurikirana kugira ngo tumenye abandi yahuye nabo nibwo twabonye iyi mibare yose.”

Akomeza agira ati “Bityo rero aho icyorezo cyaturutse nyirizina ntabwo turabasha kuhamenya, gusa bigaragara ko hari umuntu wari waturutse i Kigali kandi icyo gihe aturuka i Kigali yari yatorotse mu gace kari mu kato dutekereza ko ariho haba haraturutse ubwandu kuko mu Murenge wa Kamegeri nta bwandu twari twarigeze tuhabona no mu igenzura twari twaragiye dukora mbere kuva mu kwa Karindwi ntabwo twari twarigeze tuhabona ubwandu.”

Ubwandu bushya bwabahaye isomo

Uwamahoro yavuze ko mu Karere ka Nyamagabe hagaragaye Coronavirus bwa mbere mu ntangiriro za Nyakanga 2020 bahita bafata ingamba zo gukumira ikwirakwira ryacyo.

Muri izo ngamba harimo gushyira muri Guma mu Rugo Akagari ka Kigeme mu Murenge wa Gasaka n’aka Ruhunga mu Murenge wa Kibilizi; guhagarika serivisi z’ubuvuzi ku baza kwivuriza mu Bitaro bya Kigeme baturutse hanze; guhagarika kwakira abaturage bazana ibibazo bya bo ku karere no gushyira mu kato abantu bose bakekwa ko banduye Coronavirus cyangwa abahuye n’abanduye.

Ati “Mu ntangiriro z’ukwa Karindwi nibwo twatangiye kubona abantu banduye hano mu karere kacu dushyiraho ingamba zo gukumira ndetse twari tugeze naho tubona twayihashyije cyane cyane iyagaragaye mu nkambi, ku Bitaro bya Kigeme n’ahandi.”

Avuga ko kuba icyorezo cyongeye kugaruka bakabona ubwandu bushya nyuma y’amezi abiri, byerekana ko kigihari bityo hakwiye gukaza ingamba.

Yasabye abaturage gukanguka bakareka gukerensa amabwiriza atangwa n’inzego z’ubuzima kuko icyorezo cya Coronavirus cyica kandi gikwirakwira vuba iyo abantu batacyirinze.

Uwamahoro yavuze ko ikindi basanga kiri gutuma ubwandu bwa Coronavirus bukomeza kuboneka mu Karere ka Nyamagabe ari uko hari abadohotse mu kubahiriza amabwiriza y’inzego z’ubuzima.

Yavuze ko mu barenga 30 bamaze kugaragaraho ubwandu nta n’umwe urembye kandi harimo abagera ku 10 basanze bashobora gukurikiranywa bakavurwa bari mu ngo zabo bitewe n’aho batuye, abandi bo bakavurirwa mu kigo cyabugenewe.

Ibimenyetso bya Coronavirus birimo inkorora, ibicurane, guhumeka bigoranye n’umuriro. Yandura binyuze mu matembabuzi aturuka mu myanya y’ubuhumekero.

Mu gukomeza kwirinda ikwirakwira rya Coronavirus, abaturarwanda basabwa kwitwararika no kubahiriza amabwiriza ya Minisiteri y’Ubuzima hitabwa cyane cyane ku gukaraba intoki kenshi n’amazi n’isabune no kwambara udupfukamunwa n’amazuru mu gihe umuntu avuye mu rugo cyangwa ahuye n’abantu benshi ndetse abantu bakirinda kwegerana.

 

 

Leave a Reply

Your email address will not be published. Required fields are marked *