Dore ibyo Ingabire Marie Immaculée na Depite Habineza Frank batangaje kuri RURA

Umuyobozi uhagarariye Umuryango Mpuzamahanga urwanya ruswa n’akarengane (Transparent International) mu Rwanda, Ingabire Marie Immaculée yagaragaje impungenge z’uko Urwego rw’Igihugu Ngenzuramikorere (RURA) rushobora kuzasenya leta.

Ibi abishingira ku biciro byafashwe nk’ibihanitse ku modoka zitwara abagenzi mu buryo bwa rusange uru rwego rwashyize hanze tariki ya 14 Ukwakira 2020, aho ahamya ko rwirengagije ubushobozi bw’abaturage; ikareba gusa inyungu z’abashoramari.

Mu kiganiro yagiranye na RadioTV10 kuri uyu wa 18 Ukwakira, Ingabire Immaculée yatangaje ko yababajwe cyane no kubona RURA izamura ibiciro by’ingendo, nyuma yo kuzamura iby’amazi n’umuriro w’amashanyarazi, akaba yibaza niba abakozi b’uru rwego bafata ibi byemezo babanje kwibuka ko ubushobozi bw’abaturage butandukanye.

Ni ibi byemezo Immaculée aheraho avuga ko RURA ishobora kuzasenya leta y’u Rwanda, bitewe n’uko ibyo ikoze binengwa n’abaturage byitirirwa leta. Ati: “Reka mbabwize ukuri. Ndabizi ko bari buntuke ariko RURA nibatitonda RURA izasenya iyi leta. Iri kwiteranya n’abaturage ku buryo buteye ubwoba kandi bose bakubwira ngo ni leta, ntabwo bishimye kubera biriya bibazo bya transports (ingendo).”

Yongeyeho ko atabona impamvu yatumye RURA izamura ibiciro, mu gihe ibiciro bya lisansi byamanutse.

Ingabire Immaculée yasabye Umukuru w’Igihugu ndetse n’abadepite n’abandi bafite ububasha kuri RURA, kurenganura abaturage ibi biciro izamura bikagabanuka.

Depite Habineza Frank, Umuyobozi w’ishyaka The Democratic Green Party of Rwanda( ishyaka riharanira Demokarasi no kurengera ibidukikije mu Rwanda) muri iki gitondo cya tariki 19 Ukwakira 2020, ari mu kiganiro Zinduka kuri Radio na TV 10, yasabye ko abayobozi b’ikigo ngenzuramikorere cy’imirimo ifitiye Igihugu akamaro-RURA bakwegura niba badashobora kumva ibyifuzo by’abo bakorera.

Iyi ntumwa ya rubanda mu nteko ishinga amategeko umutwe w’abadepite, ubwo umunyamakuru Mutuyeyezu Oswald yamubazaga ku cyizere afite ku kuba RURA ishobora gusubiza inyuma cyangwa se kwisubiraho mu biciro by’ingendo, yasubije ko agifite ku kigero cya 80%.

Yagize ati“ Mfite icyizere kingana na 80%, kubera ko RURA ni Abanyarwanda, batuye mu Rwanda, bakorera Abanyarwanda. Niba bakorera abanyarwanda batishimiye ibyo bakora, bazegure”.

Yakomeje ati“ Tuzabasaba kwegura. RURA izegure, abayobozi bose begure niba badashobora kumva ibyifuzo by’abanyarwanda. Ahubwo reka mbivuge; Niba RURA idashobora gutega amatwi abanyarwanda ikorera, Abayobozi bayo begure”. Akomeza asaba ko RURA yisubiraho ku biciro yashyizeho kandi vuba, bitari cyera.

Nyuma y’inama y’abaminisitiri yateranye kuwa 12 Ukwakira 2020, ubwo mu byemezo byafashwe harimo ko imodoka zitwara abagenzi mu buryo rusange zongera gukora nkuko byari bisanzwe, RURA nk’isanzwe igena ibiciro by’ingendo yaje gutangaza ibiciro bishya, aho byavugishije benshi ndetse basaba ko bihindurwa kuko bibangamiye abagenzi batorohewe n’ingaruka z’ubukunyu bwazahajwe n’icyorezo cya Coronavirus.

 

Leave a Reply

Your email address will not be published. Required fields are marked *