Umunyamabanga Nshingwabikorwa w’Akarere ka Nyamagabe yasebeye imbere ya PAC ubwo bamusohoraga mu nama

Komisiyo y’Inteko Ishinga Amategeko ishinzwe gukurikirana imikoreshereze y’umutungo wa Leta (PAC) kuri uyu wa 5 Ukwakira 2020 yasohoye Umunyamabanga Nshingwabikorwa w’Akarere ka Nyamagabe, Ngarambe Alfred mu cyumba cy’inama imuziza kubeshya.

Ni mu gihe iyi komisiyo yabazaga Akarere ka Nyamagabe ibisobanuro ku masoko yatanzwe arengeje ingengo y’imari (2018/2019) yari yaragenewe nk’uko byagaragajwe n’Umugenzuzi Mukuru w’Imari ya Leta, Obadiah Biraro.

Iri bazwa ryabaye hifashijwe ikoranabuhanga mpuzashusho, uruhande rwa PAC ruri mu Nteko Ishinga Amategeko, uruhande rw’Akarere ka Nyamagabe ruri ahandi, bikaba bikorwa mu buryo bwo kwirinda icyorezo cya Covid-19.

Ni aho PAC yabarije Ngarambe Alfred uburyo aya masoko yarengeje ingengo y’imari. Yasobanuye ko amasoko yambukiranyije imyaka (yarengeje umwaka) mu gihe iyi komisiyo yemeza ko atagombaga kurenza umwaka nk’uko bigaragara muri raporo ya Obadiah Biraro.

Perezida wa PAC, Hon. Muhakwa Valens yahise anyomoza Gitifu Ngarambe, ati: “Nta soko rirenza umwaka. [Amasoko] mwayatanze kuri miliyoni 927, mwarateganyije miliyoni 579.”

Akarere ka Nyamagabe kahise kabazwa aho amafaranga y’u Rwanda miliyoni 351 y’amasoko arenze ingengo y’imari ya 2018/2019 bayakuye, kabazwa uburyo kadashobora gukora igenamigambi.

Gitifu Ngarambe yananiwe gusubiza ibibazo bya PAC, Akarere ka Nyamagabe gasabwa gushaka undi ubasha gusubiza ariko we agahita asohoka aho abandi bari bateraniye.

Ni uko Akarere kahise gahitamo undi ubasha gusubiza ibi bibazo, Hon. Muhakwa ategeka Gitifu Ngarambe gusohoka. Ati: “Gitifu nagende dukomeze”.

Meya w’Akarere ka Nyamagabe yaje gusobanura ko Gitifu Ngarambe amaze igihe gito mu nshingano, ikaba ari yo mpamvu atabashije gusobanura ibibazo PAC yamubajije.

 

Leave a Reply

Your email address will not be published. Required fields are marked *