Umubano wa Ndanda na Anitha Pendo uhagaze ute muri iyi minsi?

Nizeyimana Aphonse wamenyekanye nka Ndanda, umukinnyi wa ruhago wakanyujijeho mu rukundo na Anita Pendo, yahishuye uko inkuru z’urukundo rwabo zamuhungabanyije yaba mu kazi ke ndetse no mu buzima busanzwe.

Urukundo rwa Anita Pendo na Ndanda rwatangiye kuvugwa mu 2016 ariko ntirwarambye kuko mu 2018 bahise batandukana nyuma yo kubyarana abana babiri.

Gukundana no gutandukana kwabo byabaye inkuru zishyushye mu itangazamakuru. Abantu benshi bashinja umusore gutesha umwanya Anita Pendo, nubwo hari n’abandi bahamyaga ko iby’urukundo ari ibanga rya babiri.

Kuva urukundo rwa Ndanda na Anita ruhagaze, uyu mukinnyi mu kibuga ntabwo byongeye kumugendekera neza. Hari benshi batekereza ko yaba yaragizweho ingaruka n’ibibazo by’urukundo bikunze no kugora abakinnyi.

Mu 2018 ubwo yatandukanaga na Anita Pendo yari umuzamu usimbura mu ikipe AS Kigali ari no mu mwaka we wa nyuma w’amasezerano.

Ibi byatumye mu 2019 ayivamo kuko amasezerano yabo yari yarangiye. Ntiyahise abona indi kipe yerekezamo, umwaka awumara adakina umupira w’amaguru.

Kugeza muri uyu mwaka wa 2020, Ndanda nta kipe arabona nubwo avuga ko hari izo bari kuganira yizeye ko bigenze neza zamuha akazi.

Uyu mugabo yabwiye IGIHE dukesha iyi nkuru ko ibihe bikomeye yanyuzemo mu rukundo, byahungabanyije n’imyitwarire ye mu kibuga.

Ndanda ati ”Kubaho ni ubunararibonye, ejo hashize hadusigira amasomo yo kuzabaho ejo hazaza. Umupira w’amaguru ni ikintu gisaba kuba nta kindi utekereza. Ubaye atari uko biri ntabwo wawukina uwo waba uriwe wese […] Niba hari n’ibyo ugiyemo, bisaba kugira ngo ubihe umwanya wabyo ariko nugera mu kazi ntugire ikindi utekereza.”

Uyu mukinnyi ahamya kimwe mu bintu byamuzonze muri ibyo bihe ari abantu bamutukaga ku mbuga nkoranyambaga. Ibi byanatumye muri icyo gihe azifunga ukwezi kose kugira ngo yihe amahoro.

Yasabye abantu kutajya bahubukira guca imanza mu gihe baba batazi neza ukuri kwa nyiri ubwite, kuko benshi mu bamututse ubu bamusaba imbabazi.

Umubano we na Anita Pendo uhagaze ute?

Avuga ku mubano we na Anita Pendo, yahishuye ko nyuma y’uko abonye ko hari ibyo batari guhuza bishobora kubatera ibibazo bikomeye, bafashe icyemezo cyo gutandukana buri wese agatangira ubuzima bwe.

Icyakora nubwo yatandukanye na Anita Pendo ngo ni umuntu w’agaciro kuri we ndetse aramwubaha nk’uwamubyariye abana.

Ati “Hari ibintu abantu bitiranya, umuntu mu ba mwarabyaranye aba akomeye, afite agaciro gakomeye. Bitavuze ko buri wese muri twe atabona undi bakundana. Ariko icya mbere ni uko tuba twubahana tudateshanya agaciro kuko abana ni abacu.”

“Ntekereza ko ntamwifuriza ikintu kibi kandi amfitiye abana, nanjye ntiyanyifuriza ikibi kandi aziko hari abana tugomba gufatanya kurera. Mu gihe umwe muri twe yaba ameze nabi abana nabo bamera nabi kandi si ko tubyifuza.”

Ni umwe mu bakinnyi bakumbura cyane Rayon Sport nk’ikipe yanyuzemo, yamenyekanye cyane mu 2009 ubwo yari avuye muri SEC Academy yerekeje mu cyiciro cya kabiri mu ikipe ya Esperance.

Aha ntiyahatinze kuko mu 2011 Rayon Sport yahise imugura nayo ayikinira imyaka ibiri mbere y’uko avunika urwego rwe rukamanuka byatumye yongera gusubira muri Esperance.

Nyuma yo kongera kumera neza, yerekeje muri Mukura ahakina imyaka ibiri, kuva mu 2014 kugeza 2016 aho yavuye ajya muri AS Kigali yakiniye kugeza mu 2018.

Yifuza kuzasoreza urugendo rwe rwa ruhago mu butoza.

Leave a Reply

Your email address will not be published. Required fields are marked *