Uganda yiyemeje kwirukana abanyarwanda 47

Urukiko rw’ibanze rwa Kabale rwategetse ko Abanyarwanda 47 birukanwa ku butaka bwa Uganda kuko bahageze mu buryo butemewe n’amategeko.

Uretse aba Banyarwanda, hari n’abakongomani 10 barebwa n’iki cyemezo cy’urukiko.

Umwavoka wa Leta mu Karere ka Kabale, Anthony Wamibu yabwiye urukiko ruyobowe na Isaac Rukundo ko kuwa 4 Mutarama 2021, abaregwa binjiye muri Uganda bakoresheje bisi ebyiri; UAS 290Y ya kompanyi yitwa JUS bus company na UAQ 545T ya kompanyi yitwa Malaika.

Aba nk’uko Chimpreports ibitangaza, bafashwe nyuma y’aho amakuru aguye mu matwi y’abashinzwe umutekano ko hari abantu binjiye mu gihugu kandi badafite ibyangombwa byuzuye. Wamibu yabwiye urukiko ko aba biganjemo urubyiruko, hatazwi icyabagenzaga.

Umucamanza yategetse ko aba baregwa basubizwa mu bihugu byabo mu maguru mashya. Ni mu gihe bo bemeraga kwinjira muri Uganda mu buryo butemewe.

Kuva muri Gashyantare 2018, Abanyarwanda bagiriwe inama yo kutajya muri Uganda, biragoye kujya muri iki gihugu bitewe n’inzego z’umutekano zicunze imbibi. Haribazwa uburyo Abanyarwanda bangana gutyo binjiye muri Uganda, iryamiye amajanja muri ibi bihe yitegura amatora.

 

Leave a Reply

Your email address will not be published. Required fields are marked *