Ubutumwa bwa Perezida Kagame ku munsi wo kwibohora

Perezida Kagame yashimiye abitangiye urugamba rwo kubohora igihugu none kikaba gitekanye kandi buri wese yishimira iterambere cyateye mu nzego zose z’ubuzima bwacyo.

Tariki ya 1 Ukwakira mu myaka 30 ishize nibwo abana b’Abanyarwanda batangiye urugamba rwo kubohora igihugu hagamije gusubiza abagituye uburenganzira bwabo.

Uyu munsi ufatwa nk’udasanzwe kuko ari wo igihugu kivomaho iterambere kigezeho bigizwemo uruhare n’ubuyobozi bwiza budaheza.

Mu butumwa yanyujije ku rukuta rwe rwa Twitter kuri uyu wa 1 Ukwakira, Perezida Kagame, yashimye abitangiye kubohora igihugu.

Yagize ati “Ku bakunda igihugu cyacu n’inshuti zanyuze muri uru rugendo rugoye rwatugejeje aho turi uyu munsi ndetse tukaba tuhishimiye nk’igihugu. Tubakuriye ingofero kandi turabashimiye. Dukomereze aho.’’

Tariki ya 1 Ukwakira yatangirijweho ishyirwa mu bikorwa ry’umugambi wo gufasha Abanyarwanda gutahuka nyuma y’imyaka isaga 30 bari bamaze barahejejwe mu buhungiro, kandi ubutegetsi bwariho icyo gihe bukaba bwari bwarinangiye bwanga kubacyura mu nzira y’amahoro.

Ufatwa nk’intangiriro y’urugamba rwatangiye hagabwa igitero ku Mupaka wa Kagitumba. Urwo rugamba rwayobowe n’abana b’u Rwanda banze guhera ishyanga no kuba insina ngufi ahubwo batitaye ku nzira y’inzitane banyuragamo, bemera guhara ubuzima bwabo ngo igihugu gitekane. Ubu intsinzi yabo niyo igejeje u Rwanda aho ruri ubu.

Ku wa 2 Ukwakira 1990, uwari Umugaba Mukuru wa APR, Maj. Gen. Fred Gisa Rwigema yahise araswa arapfa.

Mu gihe ingabo zari zibuze uwari umuyobozi wazo nibwo Maj. Paul Kagame wari ku ishuri muri Leta Zunze Ubumwe za Amerika ku wa 20 Ukwakira, yahise azisanga ku rugamba bararukomezanya aziyoboye ndetse ahindura uburyo bw’imirwanire.

Izi ngabo zari zizi ko ziharanira ukuri zageze ku ntsinzi nyuma y’iminsi 1400 ubwo zahagarikaga Jenoside yakorewe Abatutsi mu 1994, yahitanye inzirakarengane zirenga miliyoni. Kuva ubwo igihugu giha buri wese uburenganzira bumukwiye nk’Umunyarwanda, nta guhezwa.

 

Leave a Reply

Your email address will not be published. Required fields are marked *