Semanza Laurent agomba kurangiza igihano yahawe kumufungura mbere urukiko rwarabyanze

Urwego rwasigariye Urukiko Mpuzamahanga Rwashyiriweho u Rwanda, IRMCT, rwanze ubusabe bwa Laurent Semanza wahamijwe ibyaha bya Jenoside urimo kurangiriza igihano muri Benin, wasabye gufungurwa kandi atararangiza igihano.

Semanza wari Burugumesitiri wa Komini Bicumbi, yatanze ubusabe bwe muri Nyakanga 2018, Perezida wa IRMCT, Umucamanza Carmel Agius abufataho icyemezo ku wa 17 Nzeri 2020.

Yasabaga Urwego kumufungura guhera ku wa 26 Werurwe 2019 ubwo yari kuba afunzwe bibiri bya gatatu by’igifungo yakatiwe giteganywa n’amategeko y’urwego yaregeye, na kimwe cya kabiri cy’igifungo giteganywa n’itegeko ryo muri Benin aho afungiwe, ndetse ko yahindutse ku buryo ashobora gusubira mu buzima busanzwe.

Mu gusesengura ubusabe bwe, umucamanza Carmel Agius yavuze ko harebwe niba amaze gufungwa bibiri bya gatatu by’imyaka 35 yakatiwe basanga abyujuje, ku buryo hashoboraga gusuzumwa niba yarekurwa atarangije igihano.

Harebwe ku mategeko yo muri Benin aho afungiwe, basanga avuga ko kurekura umuntu wahamijwe ibyaha na ICTR cyangwa ICTY cyangwa Urwego rwazisigariyeho, biri gusa mu bubasha bwa Perezida w’Urwego.

Umucamanza yavuze ko ibyaha aregwa bikomeye kubera ko mu rubanza, yahamijwe ko ubwe, yatemye umututsi inshuro nyinshi akoresheje umuhoro, akamwica, ko yashishikarije Interahamwe gufata ku ngufu Abatutsi, kimwe n’ibindi byaha mu bice bya Mwulire no kuri Kiliziya ya Musha.

Umucamanza yagize ati “Uko mbibona, ntabwo twasuzuma icyizere ku gusubira mu buzima busanzwe ku bahamijwe ibyaha bya Jenoside, ibyaha by’intambara n’ibyibasiye inyokomuntu, nk’uko tugisuzuma ku bahamijwe ibyaha byoroheje cyangwa ibyaha bisanzwe.”

Yatanze urugero ko kwitwara neza muri gereza bishobora kuba ikimenyetso ko umuntu azitwara neza asohotse, ariko ngo ntibyakora ku rwego rw’ibyaha byaciriwe imanza n’inkiko za ICTR, ICTY cyangwa Urwego ayoboye.

Umucamanza ntiyashize amakenga ubusabe bwe

Umucamanza yavuze ko ubwo yasuzumaga ubu busabe wa Semanza, yabonye ihitamo ry’amagambo ye iyo asobanura amateka y’ibyabaye mu Rwanda mu gihe cya Jenoside, riteye impungenge ku buryo yaba yarahindutsemo.

Nk’urugero, ngo Semanza avuga ko Abahutu mu Rwanda “batsinzwe” n’Abatutsi “bateye” baturutse mu gihugu cy’Abaturanyi, bityo bagahunga. Asobanura ko mu mubano w’Abahutu n’Abatutsi, habaye igihe kinini “Abahutu bameze nk’abacakara b’Abatutsi, bategetse mu myaka igera kuri 400. Ibi ngo byahindutse mu 1959 ubwo Abahutu bafataga ubutegetsi, byatumye Abatutsi bahunga.

Ku bwe, ngo Jenoside yakorewe Abatutsi yabaye kubera “kwihorera”, nyuma “y’imyivumbagatanyo y’Abahutu” kubera ko “Perezida w’u Rwanda, wari umuhutu yari yishwe […] ubwo indege ye yahanurwaga n’inyeshyamba.”

Bigeze ku byaha yahamijwe, umucamanza Agius yavuze ko Semanza yivugiye ko “itsinda ryakoze iperereza ryari iryo mu ruhande rwatsinze.” Ntabwo yemera ibyaha yahamijwe, ahubwo ngo yazize “akarengane”, ko ari “umwere ndetse icyemezo cy’urukiko cyari cyarateguwe mbere.”

Nyamara ngo nubwo ari umwere, yemeye gukora igifungo nta ngingimira mu gihe cy’imyaka 23, kuko yabaye umunyamahirwe kurusha abishwe muri Jenoside.

Inyandiko y’umucamanza Carmel Agius igaragaza ko Semanza mu gusaba kurekurwa atarangije igihano, yatanze inyandiko zirimo inyandikomvugo y’umuntu bafunganywe muri Tanzania no muri Mali, n’iy’umupadiri wo muri Mali wabasomeraga Misa muri gereza, mu gihe cy’imyaka 10, bombi ngo bahamya ko ari umuntu wahindutse.

Umucamanza ati “Nsanga nta buremere bwahabwa inyandikomvugo y’umuntu wakatiwe na ICTR wahamijwe ibyaha bya Jenoside n’ubwicanyi nk’icyaha cyibasiye inyokomuntu. Mu by’ukuri, kugira ngo Semanza yongere inyandikomvugo nk’iyo musi dosiye, bizamura ugushidikanya niba yumva uburemere bw’ibyaha nk’ibyo.”

Ubwo ubushinjacyaha bwagezwagaho ubwo busabe bwa Semanza, bwagaragaje imvugo ze nk’amatakirangoyi, kuko mu rubanza nta na rimwe yigeze yemera ko mu Rwanda habaye Jenoside yakorewe Abatutsi, cyangwa ngo agaragaza ukwifatanya n’abishwe n’imiryango yabo. Ahubwo ngo yabaga yishushanya nk’uwagizweho ingaruka n’ibyabaye.

Ukwicuza n’uguhinduka kwe ngo kwagombaga kuba kwemera uruhare yagize muri Jenoside no kwicuza ibyo yakoze, ariko ngo ntabyo yakoze.

Umucamanza ati “Ntitaye ku kuba avuga ko afungiwe ubusa, nsanga Semanza nta kimenyetso na kimwe agaragaza ko yagize umwanya wo kuzirikana ku byaha afungiwe. Uburyo Semanza abona amateka y’igihugu kandi bugaragaza ko atabasha kumva neza politiki n’ingabitekerezo byatumye ibi byaha bikorwa.”

Yavugaga ko aramutse arekuwe, yaca ukubiri n’ibikorwa bya politiki kuko ageze mu za bukuru, mu buryo ngo nk’ubwemerewe Simba Aloys warekuwe muri Mutarama 2019, wari warahamijwe na ICTR ibyaha bya Jenoside.

Umucamanza ariko yavuze ko hari amakuru menshi adatanga arimo n’aho asanga yazatura, ndetse n’igihugu yatangaje ko ashaka kujyamo, ntabwo yagaragaje niba yaratangiye inzira zo gushaka uburenganzira bwo kukibamo.

U Rwanda rwari rwasabye ko atarekurwa

Uretse ubushinjacyaha, u Rwanda narwo rwagaragaje ko bidakwiriye ko Semanza arekurwa kubera uburemere bw’ibyaha yahamijwe, ndetse ko bishobora guhuhura abarokotse Jenoside bari mu rugendo rwo gukira ibikomere n’ihungabana yabasigiye.

Byongeye, kurekura “abagororwa baticuza ibyaha bahamijwe n’urukiko”, ni “igitutsi ku kwibuka abishwe n’icyaha ku barokotse.”

Umucamanza Carmel Agius yanzuye ko nyuma yo gusesengura impamvu zose zatanzwe, atari igihe nyacyo cyo kwemeza ko Semanza afungurwa atarangije igifungo.

By’umwihariko, uburemere bw’ibyaha yahamijwe ngo ntabwo bwemera ko arekurwa atarangije igihano, byongeye, Semanza yananiwe kugaragaza ko yahindutse, hanabura impamvu ifatika yavuguruza izo umucamanza yasanze zimubuza kurekurwa.

Uretse ubu busabe bwasuzumwe, ku wa 16 Werurwe 2020 Semanza yasabye gufungurwa by’agateganyo kubera icyorezo cya COVID-19, avuga ko ku myaka 76 agize, ari mu byago byinshi byo kuba cyamuhitana aramutse acyanduye. Gusa icyo cyifuzo cyatewe utwatsi ku wa 21 Mata, nyuma y’uko ubuyobozi bwa gereza muri Benin butangarije ko bwafashe ingamba zo gukumira iki cyorezo.

Semanza yafatiwe muri Cameroun muri Werurwe 1996, aza koherezwa i Arusha ari naho yaburaniye, ku wa 15 Gicurasi 2003 urukiko rumuhamya ibyaha bya Jenoside, gushishikariza abantu gufata ku ngufu, iyicarubozo n’ubwicanyi nk’icyaha cyibasiye inyokomuntu, akatirwa gufungwa imyaka 25. Mu bujurire yaje kugirwa imyaka 35.

Ku wa 8 Ukuboza 2008, Semanza yoherejwe kurangiriza igihano muri Mali, mu Ukuboza yimurirwa muri Benin.

 

Leave a Reply

Your email address will not be published. Required fields are marked *