Nyirarugendo wagizwe Guverineri ni muntu ki?

Nyirarugero Dancilla wagizwe Guverineri w’Intara y’Amajyaruguru, yatangaje ko yakangutse ubwo telefoni nyinshi zamuhamagaraga nijoro, agatungurwa no kubwirwa ko agizwe Guverineri w’Intara y’Amajyaruguru.

Mu kiganiro yagiranye na Kigali Today,dukesha iyi nkuru yavuze ko amakuru yuko yabaye Guverineri w’Intara y’Amajyaruguru yayibwiwe n’inshuti ze zamukanguye yamaze kuryama.

Ati: “Iriya nkuru nayimenye mu masaha akuze mu ma saa tanu, abantu bankanguye bambwira ko ngizwe Guverineri, bampamagaye ari benshi kuri telefoni.”

“Abana banjye bari batararyama barankangura bumvise telefoni isakuza cyane, nibwo nasanze abantu bambuze nitabye umwe n’ibyishimo byinshi ati ’Umaze kugirwa Guverineri, numva birantunguye.”

Guverineri Nyirarugero yari asanzwe ari umwarimu mu Ishuri ry’Ubumenyingiro rya Muhabura Integrated Polytechnic College (MIPC), aho yanazindukiye ajya kwigisha mu gitondo cyo kuri uyu wa Kabiri.

Avuga ko ubwo yageraga kuri ririya shuri abanyeshuri n’abarezi bagenzi be bateye hejuru bamugaragariza ibyishimo.

Ati: “Nk’umwarimu wabigize umwuga kandi ubikunda nazindukiye mu kazi ku ishuri, abanyeshuri bambonye barasakuza banyereka ko bishimiye inshingano nshya nahawe, ariko iyo umuntu ari umurezi biba bikurimo nyine, uba uri umubyeyi abanyeshuri banjye bishimye cyane n’abo dukorana bampa Félicitations”.

Uyu muyobozi yashimiye byimazeyo Umukuru w’Igihugu wamugiriye icyizere amuha inshingano zo kuyobora Intara y’Amajyaruguru, amwizeza kuzatunganya neza inshingano yamushinze.

Ati “Mbikuye ku mutima, ndashimira Nyakubahwa Perezida wa Repubulika ku bw’icyizere yangiriye cyo kuyobora Intara y’Amajyaruguru.”

” Mwijeje ko ntazamutenguha cyangwa by’umwihariko ngo ntenguhe umuryango wa FPR, kuko nari nsanzwe ndi umunyamuryango nkoreramo n’imirimo bisanzwe, kandi na none nijeje umukuru w’igihugu ko nzaharanira icyateza imbere Intara y’Amajyaruguru n’u Rwanda muri rusange, ibyo ndabimusezeranyije ntabwo nzatenguha igihugu cyanjye”.

Guverineri Nyirarugero yasabye abaturage bo mu Ntara y’Amajyaruguru ubufatanye, mu guharanira gukomeza kuzamura iterambere ry’Intara yabo.

Ati: “Icyo nsaba abaturage b’Intara y’Amajyaruguru, ni uko twese twafatanya buri wese agashyiraho imbaraga ze akurikije uko zingana, akabikora abikuye ku mutima, kandi nidufatanya nzi neza ko Intara yacu tuzayiteza imbere hatagize igisigara inyuma.”

Guverineri Nyirarugero ni muntu ki?

Guverineri mushya w’Intara y’Amajyaruguru yavukiye mu Murenge wa Muhoza mu Karere ka Musanze, ashakana na Nkundimana Fidèle mu Karere ka Nyabihu.

Bombi batuye mu kagari ka Ruhengeri ho mu murenge wa Muhoza mu karere ka Musanze, aho bafitanye abana bane.

Imfura ye yarangije Kaminuza, ukurukiyeho arangije umwaka wa mbere muri Kaminuza y’u Rwanda, uwa gatatu ari mu mashuri yisumbuye mu mwaka wa gatandatu mu gihe bucura ari mu mwaka wa kane w’amashuri yisumbuye.

Guverineri mushya w’Intara y’Amajyaruguru afite impamyabumenyi ebyiri z’icyiciro cya gatatu cya Kaminuza (Masters), yakuye muri kaminuza zinyuranye zo mu mahanga.

Amashuri abanza yayize ku ishuri rya Rungu mu murenge wa Gacaca mu Karere ka Musanze, ayisumbuye ayigira muri Lycée Notre Dame de Citeaux i Kigali.

Icyiciro cya kabiri cya Kaminuza yakize muri INES-Ruhengeri, aho yahise ahabwa akazi ko kwigisha muri iyi Kaminuza nyuma yo kugira amanota yo hejuru.

Ubwo yari umwarimu muri INES-Ruhengeri, Guverineri Nyirarugero yakomeje kugira inyota yo kongera ubumenyi, abifatanya no kwiga icyiciro cya gatatu cya Kaminuza muri Kaminuza ya Makerere muri Uganda, aho yakuye impamyabumenyi y’icyiciro cya gatatu cya Kaminuza kuva mu mwaka wa 2009.

Nyuma ya 2009 yakomeje akazi muri MIPC aho yari akuriye ishami rya Business Studies, ariko hagati aho muri 2017 yagiye kongera ubumenyi mu gihugu cy’u Budage aho yakuye indi mpamyabumenyi y’icyiciro cya gatatu mu 2019, yiyongera ku yindi mpamyabumenyi yari yavanye muri Makerere.

Guverineri Nyirarugero avuga ko akunda gusenga, aho asanzwe asengera mu itorero Anglican muri Diyosezi ya Shyira Katedarali Yohani Umubatiza wera, akaba ari umwe mubagize Korali y’ababyeyi yitwa ’Jyana Umucyo’.

 

Leave a Reply

Your email address will not be published. Required fields are marked *