Nta kizere ko intambara iri kubera muri Ethiopia izarangira vuba

Umukuru wa leta ya Tigray yo mu majyaruguru ya Ethiopia yanze ubusabe bwa minisitiri w’intebe bwo kuba we n’ingabo ze bamanitse amaboko bakemera ko batsinzwe bitarenze ku wa gatatu, asezeranya gukomeza imirwano.

Debretsion Gebremichael yahakanye ibivugwa na leta ya Ethiopia ko umurwa mukuru Mekelle wa Tigray wazengurutswe n’ingabo zayo.

Amakuru avuga ko abantu babarirwa mu magana bishwe naho ababarirwa mu bihumbi za mirongo bahunze iyi mirwano imaze ibyumweru hafi bitatu.

Umuryango w’abibumbye (ONU/UN) waburiye ko iyo mirwano ishobora gutera amakuba yatuma abantu benshi bo mu karere bacyenera imfashanyo.

Bivugwa ko kuri uyu wa kabiri ikibazo cya Ethiopia na leta ya Tigray kiza kuganirwaho mu kanama k’umutekano ka ONU.

Ku cyumweru, Minisitiri w’intebe wa Ethiopia Abiy Ahmed yari yatanze amasaha 72 ku mutwe wa TPLF ngo ube wamanitse amaboko, ndetse igisirikare cya Ethiopia kiburira abaturage 500,000 batuye i Mekelle ko abasirikare “bazagota” uwo mujyi bakawugabaho igitero.

Ariko Bwana Debretsion, ukuriye TPLF, yavuze ko Minisitiri w’intebe “adasobanukiwe abo turi bo. Turi abantu bahagarara ku ihame kandi biteguye gupfa mu guharanira uburenganzira bwacu bwo gutegeka akarere kacu”, nkuko bitangazwa n’ibiro ntaramakuru AFP.

TPLF ni ryo shyaka rikomeye muri Tigray ndetse ryigeze kuba rifite umutwe ukomeye w’intagondwa wayoboye urugamba rwo guhirika leta ya Ethiopia yari iriho, mu mwaka wa 1991.

Nkuko bitangazwa n’ibiro ntaramakuru Reuters, umukuru wa Tigray yanavuze ko ibivugwa na leta ya Ethiopia ku murwa mukuru Mekelle ari uburyo bwo guhishira ko ingabo zayo zicyeneye kongera kwisuganya, nyuma yo gutsindwa ahantu hatatu.

Biragoye cyane kugenzura ibirimo kubera muri ako karere kubera ko itumanaho ryahagaze.

Ni iki kindi kirimo kuba?

Leta ya Ethiopia yashinje ingabo za TPLF gusenya ibikorwa-remezo birimo n’ikibuga cy’indege cyo mu mujyi umaze igihe wa Aksum (Axoum) usurwa na ba mukerarugendo aho muri Tigray, nkuko bitangazwa n’urubuga rw’amakuru FANA rubogamiye kuri leta ya Ethiopia.

Yatangaje amafoto y’umuhanda wo ku kibuga cy’indege wabaye nk’intabire, ishinja abarwanyi ba TPLF konona ubukungu bw’ako karere.

TPLF ntabwo iragira icyo itangaza ku mugaragaro kuri ibyo birego, ariko ku cyumweru Bwana Debretsion yabwiye ibiro ntaramakuru Reuters ko ingabo ze zashoboye guhagarika ingabo za leta ya Ethiopia.

Yagize ati: “Barimo gukomeza kohereza [ingabo] ariko ntacyo bageraho”.

 

Leave a Reply

Your email address will not be published. Required fields are marked *