Nsanzimana n’umubyeyi we, Cyiza Odette abaturanyi babita inkende: bigomba guhinduka

Inkuru y’umusore abaturanyi bita inkende witwa Nsanzimana Elie utuye mu mudugudu wa Rubazi, Akagari ka Ruturo, Umurenge wa Kibirizi mu Karere ka Gisagara, yasakaye mu batuye Isi nyuma y’icyumweru kimwe itangajwe.

Iyi nkuru yatangajwe na Afrimax TV tariki ya 17 Ugushyingo 2020, igamije kumushakira ubufasha bitewe n’ubukene umuryango we ubamo, igera ku bitangazamakuru bikomeye birimo Daily Star cyo mu Bwongereza. Igaragaza imibereho idasanzwe y’uyu mwana w’imyaka 21 y’amavuko ndetse n’uburyo bugayitse abatwamo n’abaturanyi.

Nsanzimana Elie yavutse mu 1999, akaba ari urubyaro rwa gatandatu muri umubyeyi we witwa Cyiza Odette yabyaye. Ngo abandi bana bane bakurikiranye, barapfuye, asigarana na mukuru we akurikira. Kuvuka no gukura k’uyu mwana ngo ni igisubizo cy’Imana nk’uko uyu mubyeyi yabivuze, bitewe n’uko abandi batigeze babasha gukura.

Nsanzimana n’umubyeyi we, Cyiza Odette

Cyiza Odette yabwiye umunyamakuru ko uyu mwana atabasha kuvuga gusa akumva kumutumye igikoresho, ajya kukizana.

Gusa kandi, uyu musore agaragaza imyitwarire isaba kumuhora hafi irimo gukunda kujya mu mashyamba y’inturusu, aho kuba mu rugo.

Nsanzimana ntabwo aguma hamwe, akenshi aba yirukankana n’abana baba bamuhururiye, rimwe na rimwe bamukubita bamuhora imyitwarire ye. Umubyeyi we yagize ati: “Mpora muragiye nk’uragiye itungo, naho we ahora ancika.” Umuturanyi uri mu bafata uyu mwana nk’aho atari umuntu, ati: “No mu ishyamba yakwiberamo, bishoboka yakwiberamo batamukurikiranye.”

Uyu mubyeyi kandi ababazwa n’uko abaturanyi b’uyu mwana (abakuru n’abana) bamufata: “Uretse kumwita inkende, umubonye agakomera ngo dore inkende, iyo bamwise inkende rero mbona ari umuntu nk’abandi, nabyo numva bimbabaje.”

Gisagara:Inkuru y’umusore bakunze kwita "inkende' wikundira kuba mu ishyamba ikomeje gusakara ku isi

Ngo abaturanyi ntibatinya kwitira Nsanzimana inkende imbere ye. Ati: “Bakanamuhunga, ukabona barirrutse ngo dore inkende. Ubwo rero iyo bigenze bityo, numva binkomerekeje, ugasanga ndimo ndababwira nabi.”

Kwita Nsanzimana inkende, ngo binajyana n’ibihuha bikwirakwira bivuga ko yaba arisha ibyatsi cyangwa akona imyaka nk’itungo. Ibi byose nyina w’umwana arabyamagana, kuko ngo ari umuntu nk’abandi.

 

Leave a Reply

Your email address will not be published. Required fields are marked *