Amajonjora y’ibanze y’iri rushanwa yari ateganyijwe gutangira ku wa 09 Mutarama 2021, gusa abategura ririya rushanwa bavuze ko ririya rushanwa ribaye risubitswe kubera ingamba Leta iheruka gushyiraho zo kwirinda ikwirakwira ry’icyorezo cya Covid-19.

Miss Rwanda 2021 yagombaga gutangira muri uku kwezi ntikibaye

Mu byemezo by’inama y’Abaminisitiri yateranye ku wa Mbere tariki ya 04 Mutarama, harimo ko amateraniro rusange arimo imihango y’ubukwe y’ubukwe ikorerwa mu nsengero, kwiyakira ndetse n’inama hamwe n’ibindi bikorwa bihuriza hamwe abantu benshi bibujijwe, mu rwego rwo kwirinda icyorezo cya Covid-19.

Miss Rwanda mu itangazo yasohoye ntiyasobanuye igihe ririya rushanwa rizasubukurirwa, gusa yavuze ko igikorwa cyo kwiyandikisha kigikomeje ku rubuga rwayo.

Abategura ririya rushanwa bavuze ko amatariki mashya ririya rushanwa rizaberaho cyangwa izindi mpinduka zishobora kubaho zizatangazwa mu minsi iri imbere.

Ibi bisobanura ko Nishimwe Naomie wegukanye ikamba rya Nyampinga w’u Rwanda mu mwaka ushize wa 2020 ari we ugomba kurigumana kugeza igihe iri rushanwa rizasubukurirwa hakamenyekana ugomba kumusimbura.