Minembwe yabaye isibaniro ry’intambara

Abantu bagera kuri 40 bamaze kugwa mu mirwano ikomeje kuvugwa mu Minembwe ho muri Teritwari ya Fizi muri Kivu y’Amajyepfo, ikomeje gushyamiranya inyeshyamba za Maï-Maï n’umutwe wa Ngumino-Twigwaneho, yatangiye mu ntangiriro z’iki cyumweru.

Kawaya Mutipula Aimé uyobora Teritwari ya Fizi, yabwiye 7SUR7.CD ko abenshi mu bapfuye baguye mu gace ka Lulenge, yongeraho ko abarenga 30 mu bapfuye ari abo ku ruhande rwa Ngumino-Twirwaneho, umutwe Abanyamulenge bashinze mu rwego rwo guhangana n’ibitero bikomeje kubibasira.

Yagize ati: “Impande zombi zapfushije abantu, ariko hari n’abasivili bamwe bapfuye. Abarenga 32 bishe ku ruhande rw’umutwe wa Ngumino. Aba na bo bagabye igitero ku birindiro bya Maï-Maï i Lulenge, bica abantu icyenda. Abenshi mu baturage bari batuye i Lulenge bavuye mu byabo bahunga imirwano.”

Muri Béni ho inyeshyamba 10 za ADF-NALU zishwe na FARDC

Muri Teritwari ya Béni ho mu Ntara ya Kivu y’Amajyaruguru ho haravugwa inkuru y’abarwanyi babarirwa mu icumi n’umutwe wa ADF bishwe n’ingabo za Repubulika Iharanira Demokarasi ya Congo, FARDC.

Byabereye mu gace ka Kwele gaherereye nko ku bilometero bitanu uvuye mu mujyi wa Kainama.

Umuvugizi wa Operasiyo ya gisirikare Sokola 1 ikorera muri Béni, Lt. Antony Mualushayi, yavuze ko bishe izi nyeshyamba nyuma yo kuzitega agatego.

Yagize ati: “Twateze abarwanyi ba ADF, twari dufite amakuru y’aho bagombaga kunyura. Operasiyo yagenze neza hanyuma dushobora kwica 10 muri bo tunafata mpiri abandi.”

Lt. Mualushayi yavuze ko banafashe ibikoresho bya gisirikare bitandukanye bitandukanye bigizwe n’imbunda zo mu bwoko bwa AK-47.

Abarwanyi ba ADF bishwe abandi muri bo bafatwa mpiri, mu gihe hari hashize iminsi bagaba ibitero byaguyemo abasirikare n’abasivili benshi.

Mu ntangiriro z’iki cyumweru ho bariya barwanyi bagabye igitero kuri gereza ya Kangbayi iherereye mu mujyi wa Béni, zicikisha imfungwa zirenga 1400 ziganjemo inyeshyamba z’imitwe ya ADF na Mai-Mai.

Magingo aya imfungwa nke mu zari zaratirotse zamaze kongera gufatwa, izindi ziricwa.

 

Leave a Reply

Your email address will not be published. Required fields are marked *