Kurya ubunyano hakoreshejwe ikoranabuhanga! Covid 19 ntigomba kuduhagarikira gahunda

Perezida Kagame yatangaje ko nyuma y’igisa n’ikiruhuko cyatewe na Coronavirus mu rwego rw’ubukerarugendo, ubu u Rwanda rwongeye gufungura amarembo ku buryo abantu barusura, agaragaza ubufatanye bw’igihugu na Arsenal nk’irembo ryo kuranga ibyiza nyaburanga biri mu rw’imisozi igihumbi.

Nibwo bwa mbere mu nshuro 16 umuhango wo Kwita izina wabaye mu buryo bw’ikoranabuhanga kubera inzitizi zatewe n’icyorezo cya Coronavirus. Wamaze isaha imwe mu kiganiro cyari kiryoheye ijisho cyatambutse kuri Televiziyo y’u Rwanda.

Abakinnyi batatu ba Arsenal barimo kapiteni wayo, Pierre-Emerick Aubameyang wise umwana w’ingagi izina rya Igitego; Héctor Bellerín wise ingagi izina rya Iriza na Bernd Leno wayise Myugariro nibo bari abashyitsi muri uyu muhango.

Perezida Kagame yavuze ko uyu mwaka ari umwihariko ku barinzi ba Pariki, abashinzwe kumenya aho ingagi ziri, abazivura, abayobora abazisura ndetse n’abakira abaje muri pariki, ashima by’umwihariko ubwitange bubaranga.

Umukuru w’Igihugu yavuze ko kubungabunga ibidukikije, ubukerarugendo n’iterambere ry’abaturage ari ibintu bidasigana kuko kimwe gituma ikindi gikomera.

Ati “Ndashimira abaturiye pariki kuba bakomeje kuba abarinzi beza b’ibidukikije, bakanakira neza abashyitsi baza batugana.”

Kuva mu 2005, leta yashyizeho gahunda yo gusaranganya inyungu aho amafaranga angana na 10% by’inyungu iva mu bukerarugendo ashyirwa mu bikorwa by’abaturiye za pariki.

Kuva iyi gahunda yatangira, amafaranga asaga miliyoni 5.5$ amaze gushorwa mu mishinga 700 y’abaturiye Pariki y’Igihugu y’Ibirunga, Pariki y’Igihugu y’Akagera na Pariki y’Igihugu ya Nyungwe.

Perezida Kagame mu ijambo rye kandi yavuze ku bafatanyabikorwa b’u Rwanda muri gahunda zo kwamamaza ubukerarugendo, avuga by’umwihariko kuri Arsenal imaze imyaka ibiri yamamaza gahunda ya “Visit Rwanda”.

Yavuze ko abakinnyi bayo batatu bagize umwanya wo kwita izina ingagi basigiye ikimenyetso gikomeye izi nyamaswa.

Ati “Arsenal ni umufatanyabikorwa mwiza muri gahunda yacu yo kwerekana akamaro ko kubungabunga ibidukikije no kubwira Isi ko gusura u Rwanda ari amahirwe y’imbonekarimwe.”

Yakomeje agira ati “Ndashimira kandi abafatanyabikorwa bacu mu by’amahoteli badufasha mu kugira u Rwanda nyabagendwa. Nyuma y’ikiruhuko cyatewe n’icyorezo cya COVID-19, u Rwanda rwongeye kugurura amarembo ku barusura.”

“Twishimiye kubona imiryango myinshi y’Abanyarwanda n’abaturarwanda bafata umwanya bagasura ibyiza by’iwacu. Ndizera ko ibi bizakomeza, n’igihe abashyitsi baturuka mu mahanga bakomeje kuza kwihera ijisho ibyiza nyaburanga by’igihugu cyacu.”

Umuyobozi ushinzwe Ubukerarugendo mu Rwego rw’Igihugu rw’Iterambere (RDB), Belise Kaliza, yavuze ko abaturiye za pariki batezwa imbere binyuze mu bikorwa remezo nk’amashuri, amavuriro, amazi meza, imiturire, kubaka imihanda n’ibindi.

Ati “Kimwe cya gatatu cyo ni imishinga y’ubuhinzi n’ubworozi, naho igice gisigaye kiri mu bikorwa byo gukemura amakimbirane ashobora kubaho hagati y’abaturage na pariki.”

Yavuze ko iyi gahunda yatanze umusaruro ukomeye mu buryo abaturage bita kuri pariki n’ibinyabuzima by’agasozi.

Yagize ati “Byongeye, twabonye ko ubufatanye bwazamutse cyane mu kurwanya ba rushimusi n’amakimbirane hagati y’abantu n’inyamaswa zo muri pariki.”

Umuyobozi wa RDB, Clare Akamanzi, yashimiye abaganga b’ingagi bakomeje gukora ibishoboka byose mu kuzirinda muri ibi bihe by’icyorezo hamwe n’abaturarwanda bakomeje kwitabira gahunda ya Tembera u Rwanda, bagasura ibice bitandukanye by’igihugu.

Ati “Ndashishikariza buri Munyarwanda kubyaza umusaruro gahunda zihariye twashyizeho, kugira ngo basure igihugu cyabo, barusheho kukimenya. Abaturiye za pariki nabo ntabwo twabona uko tubashimira, ubufatanye n’ubushake bagaragaza mu kurinda no kubungabunga pariki z’igihugu, ndifuza kubashimira nivuye inyuma, mu izina rya buri wese muri uru rwego.”

Uyu muhango wo Kwita Izina ku nshuro ya 16 wabaye mu gihe u Rwanda ruherutse kugabanya ibiciro byo gusura ingagi, aho byagabanyijwe ku kigero cya 86% bigera ku 200 $ ku Banyarwanda na 67% ku banyamahanga batuye mu Rwanda biba 500$, ku bandi hagumaho 1500$ yasabwaga buri wese ukeneye kureba ingagi.

Ubukerarugendo ni rumwe mu nzego zifatiye runini u Rwanda kuko mu 2019 mu musaruro mbumbe wose w’igihugu, bwari bufitemo 10% mu gihe na mbere yaho umusaruro w’ibyo igihugu cyinjiza biturutse mu bukerarugendo wagiye wiyongera ku kigero cya 11% na 9% kuva mu 2008 kugera mu 2019.

Mu 2017, ubukerarugendo bwinjirije u Rwanda miliyoni 438$, mu gihe intego ya 2024 ni uko ruzabusaruramo miliyoni 800$.

 

Leave a Reply

Your email address will not be published. Required fields are marked *