Kuki Covid 19 yibasira abapadiri igatinya za gereza?

Kiliziya Gatolika muri Tanzania iravuga ko mu mezi abiri ashize, Ababikira 60 n’abapadiri 25 bapfuye nyuma yo kwerekana ibimenyetso by’icyorezo cya Coronavirus.

Umunyamabanga w’Inama Nkuru y’Abepiskopi muri Tanzania, Padiri Charles Kitima, yavuze ko Covid-19 ari ukuri muri Tanzania, mu gihe Perezida John Pombe Magufuli yakunze kugaragaza ko iki cyorezo nta kiriho.

Padiri Kitima yemeje aya makuru kuri uyu wa Gatatu mu kiganiro yagiranye n’itangazamakuru.

Ni ikiganiro kibanze ku ngingo zitandukanye cyane iya COVID-19, aho yasabye Abakristu gukora ibishoboka byose bagafa ingamba zo kwirinda COVID-19 bagendeye ku mabwiriza ya Minisiteri y’Ubuzima.

Padiri Kitima yavuze ko bariya bapadiri bapfuye kuva rwa gati mu kwezi k’Ukuboza kugeza muri Gashyantare mu bice bitandukanye bya Tanzania.

Yavuze ko adashobora kwemeza ko abo bariya bihaye Imana bishwe na Covid-19 kuko batapimwe, n’ubwo berekanye ibimenyetso bya COVID-19 birimo “guhumeka bigoranye.

Ati: “Abantu ntibapimwa. Iyo ni ingorane ikomeye.Kiliziya ifite amavuriro agera kuri 500 mu gihugu, ariko ntitwemerewe gupima kandi nta bikoresho dufite byo kubikora.”

Yavuze ko Kiliziya yabonye ko imvugo y’abategetsi muri leta ya Tanzania yahindutse ku byerekeye ingamba zo kwirinda Covid-19, ariko avuga ko abantu batari bake batubahiriza izo ngamba kuko nta bihano biteganyirijwe abazirengaho.

Ni ku ncuro ya kabiri Kiliziya Gatolika muri Tanzania itera hejuru ku bijyanye na COVID-19 muri Tanzania, dore ko muri Mutarama na bwo yari yatabaje ivuga ko ibona ubwiyongere bw’abapfa muri za Paruwasi zitandukanye.

Tanzania nta mibare y’ubwandu bwa Covid-19 iratangaza kuva muri Gicurasi Umwaka ushize.

Ishami ry’Umuryango w’Abibumbye ryita ku buzima OMS, ryakunze gusaba Tanzania gutanga amakuru kuri kiriya cyorezo, no kwemera ikava ku izima na yo ikakira inkingo za COVID-19 ziri gutangwa binyuze muri gahunda ya Covax.

 

Leave a Reply

Your email address will not be published. Required fields are marked *