Kisekedi yababariye ushinjwa kwica Kabila

Perezida wa Repubulika ya Demukarasi ya Congo, Félix Tshisekedi yahaye imbabazi Col. Eddy Kapend wahamijwe uruhare rukomeye mu rupfu rwa Laurent Desire Kabila, se wa Joseph Kabila.

Ni amakuru umwe mu bagize Guverinoma ya RDC yahamirije igitangazamakuru Actualité kuri uyu wa 1 Mutarama 2021, nyuma y’aho muri izi mpera z’umwaka w’2020, Perezida w’ishyirahamwe nyafurika riharanira uburenganzira bwa muntu (ASADHO), Jean Claude Katende yari yatakambiye Umukuru w’Igihugu, amusaba ko yaha imbabazi uyu musirikare na bagenzi be bamaze imyaka 19 bafunzwe, bazira icyo yise ’akarengane’.

Ubusabe nk’ubu, ASADHO yari yabugejeje kuri Perezida Tshisekedi ubwo RDC yizihizaga umwaka wa 60 yari imaze ibonye ubwigenge, ndetse no muri Mata 2020 nk’uko Radio Okapi ibigaragaza.

Katende mu busabe bushya yagize ati: “Ndongera gutakamba kugira ngo Perezida Felix ahe Imbabazi za Perezida mu gihe cy’iminsi mikuru isoza umwaka, Eddy Kapend na bagenzi be. Umwaka utaha baruzuza imyaka 20 muri gereza. Birakabije ku bantu bahamijwe ibyaha mu rubanza rubogamye.”

Kapend ni mubyara wa Laurent Desire Kabila wari Perezida wa RDC. Icyo gihe yari umuntu we w’umwizerwa ku buryo byageze aho amugira Umugaba Mukuru w’Ingabo mu 1998.

Kapend yafunzwe tariki ya 24 Gashyantare 2001. Amateka avuga ko icyatumye afungwa ari uko tariki ya 16 Mutarama 2001 ubwo yasanze [LD Kabila] amaze kwicwa n’umurinzi we witwaga Rashid Mizele, yahise amusimbura ku butegetsi.

Nyuma yo gufungwa kandi, Ubushinjacyaha bw’igisirikare bwashinje Kapend kurasa Mizele wishe Kabila, agahisha imbunda yamurashishije no kugerageza guhirika ubutegetsi. Ibi byaha byaramuhamye, akatirwa igihano cy’urupfu, hamwe n’abandi babarirwa mu 10.

Gusa bitewe n’ubusabe bw’imiryango itandukanye, Perezida Tshisekedi yamusabiye imbabazi, akurikirwaho igihano cy’urupfu hamwe na bagenzi be, gisimbuzwa icya burundu. Na nyuma yaho imiryango nka ASADHO yakomeje gutakamba, kugeza ubwo uyu musirikare aherewe imbabazi zituma afungurwa.

Bivugwa ko hari abandi bagenzi ba Kapend uyu Mukuru w’Igihugu yahaye imbabazi, gusa amazina yabo ntabwo aramenyekana.

Imbabazi zihawe Kapend zikurikiranye n’izindi Perezida Tshisekedi yahaye bagenzi be batanu bari muri dosiye imwe yo kwica Laurent Kabila barimo: Jean Claude Kamwanga, Jean Jacques Kapia, Maurice Kalokota, Meschack Luhunga na Koto Dur, tariki ya 30 Kamena 2020.

 

Leave a Reply

Your email address will not be published. Required fields are marked *