Ituro rikwiriye kuribwa uwarituye yaburaye?

Mu gihe hari abamaze igihe banengera abashumba kwaka no kurya amaturo babigereranya n’ubujura, bamwe mu bakora umurimo w’ivugabutumwa mu Rwanda bemeza ko bifatwa uko bitari, Bishop Gatera we akavuga ko ahubwo “utariye ituro, aba ahemukiye uwarituye.”

Bishop Gatera ukorera ivugabutumwa mu Murenge wa Kabarondo w’Akarere ka Kayonza, Pasiteri Niyonzima Claude na Apôtre Liliane Mukabadege, baganiriye n’umunyamakuru wa Televiziyo ya BTN dukesha iyi nkuru, bavuga ukuri kwabo kuri iyi ngingo, bifashisha n’imirongo iri muri Bibiliya.

Bishop Gatera yagize ati: “Aho kugira ngo ajye kwikopesha bayatuye, yayarya. Buri bwoko bwose bw’ituro, twemerewe kurirya 100%. Utanaririye, uba uhemukiye uwarituye. Hari ayo turya, hari ayo dukoresha imirimo yo kubaka insengero, hari ayo gufasha.”

Pasiteri Niyonzima mu gitekerezo cyunganira icya Gatera, yagize ati: “Gutura ni ngombwa. Ahubwo abantu benshi hari igihe bafata ituro bakaryitiranya. Buri kintu cyose kigira igarama, ntushobora kujya muri coaster y’umuntu, ngo uyigenderemo ubusa. Hari igarama ya essence aba yashyizemo. Nawe ugomba gutanga igarama. […] Umukozi wa leta, agira aho ahemberwa. N’umukozi w’Imana rero agira aho ahemberwa. Imana ntabwo ikoresha abantu badahembwa.” Yifashishije igitabo cya Malaki 3:7.

Apôtre Liliane Mukabadege na we yavuze ko abantu babivugaho, bakabikabiriza. Avuga ko hari amaturo agomba gutunga abashumba, Ati: “Hari ituro ry’abakene, hari ituro ryo kubaka urusengero, hari ituro ry’icya cumi, hari ituro ry’umutima ukunze, ariko hari n’ituro rigenewe kugira ngo umushumba arikoreshe mu bibazo bye.”

Apôtre Mukabadege yongeyeho ko nta kosa riri mu kurya ituro, kuko ngo umushumba ntiyakwirirwa abwiriza ubutumwa, ngo abure amafaranga yo kumufasha mu rugendo (déplacement), ayo kurihira abana amashuri, ayo kwishyura inzu n’atunga urugo.

Igitutu ku bashumba baka bakanarya amaturo, cyatutumbye cyane muri ibi bihe bya Covid-19, aho bamwe muri bo bari batangiye kuyaka, nyamara bamwe mu bagize umuryango nyarwanda bakavuga ko bidakwiye, kuko abakirisitu (intama) bari mu bukene ku buryo ahubwo bakwiye gufashwa. Ni ho batangiye kwibazwa niba koko gutanga amaturo ryaba ari itegeko ry’Imana, cyangwa se ibyifuzo by’abashumba.

 

Leave a Reply

Your email address will not be published. Required fields are marked *