Ikiri inyuma y’ifungwa rya za Resitora mu mugi wa Kigali

Ubuyobozi bw’Umujyi wa Kigali bwafunze uburiro (Restaurants)bukomeye bugera kuri 12 nyuma y’ubugenzuzi bwakozwe bwagaragaje ko zishobora gushyira mu kaga ubuzima bw’abazigana kubera ikibazo cy’isuku.

Uburiro buzazamura ubuziranenge ndetse bukuzuza ibisabwa n’Umujyi wa Kigali birebana n’isuku buzemererwa kongera gufungura nyuma yo guhabwa uburenganzira.

Muri resitora zasabwe gufunga harimo Billy’s, resitora yo mu rwego rwo hejuru iherereye mu gace gakize ka Nyarutarama.

Izindi ni zirimo Classic Hotel yo ku Kicukiro, Come Again Bar i Remera na Nyirasafari Chantal Restaurant iherereye Nyabugogo.

Iki gikorwa cy’ubugenzuzi kandi nk’uko tubikesha TNT cyasize hari ahagurishirizwa inyama (butcheries) hatujuje ubuziranenge mu bijyanye n’isuku hafunzwe.

Mu kiganiro cyihariye yagiranye na The New Times, Umuyobozi w’Umujyi wa Kigali, Pudence Rubingisa yahamagariye ubucuruzi butandukanye kubahiriza imirongo yashyizweho n’umujyi mu rwego rwo kwirinda ko ibikorwa byabo byabangamirwa.

Rubingisa yagize ati: “Tugomba kumenya neza ko amahame y’uyu mujyi yubahirizwa haba mu isuku, kwiyongera kw’abawutuye, cyangwa mu kurengera ibidukikije n’ibindi.”

Ku bijyanye n’umutekano, Umuyobozi w’umujyi yavuze ko ubucuruzi bukorera ahantu hakiri kubakwa bushyira mu kaga abaturage kandi Umujyi uri kwihutira gufata ingamba zo kubungabunga umutekano.

Umuyobozi w’Umujyi wa Kigali yongeyeho ko ubugenzuzi buzakomereza mu bindi bice by’umujyi harebwa ko ibisabwa bitarenzweho.

 

Leave a Reply

Your email address will not be published. Required fields are marked *