Icyemezo cyo kudaha akazi k’ubwarimu abo mu yandi madini kizaba kibangamye(RDC)

Umuyobozi wa Kiliziya Gatolika muri Repubulika Iharanira Demokarasi ya Congo, Karidinali Fridolin Ambongo yavuze ko guhera mu mwaka utaha Kiliziya itazongera guha akazi abarimu batari abayoboke bayo mu bigo by’amashuri bigengwa nayo

Ibi Karidinali Ambongo yabitangaje mu gihe habura icyumweru kimwe gusa ngo amashuri muri icyo gihugu yongere gusubukura ibikorwa byayo. Karidinali Ambongo kandi yavuze ko Kiliziya ishaka gushyiraho uburezi rusange mu mashuri yo hasi .

Mu ijambo rye yavuze ko Kiliziya yifuza abakozi by’umwihariko abarimu bafite indangagaciro za gikristu, ari nabyo byatumye batekereza ku guha akazi abarimu bazwi neza ko ari abayoboke b’ukuri ba Kiliziya Gatolika.

Yagize ati: “Guhera ubu, turashaka ko abarimu bo mu mashuri abanza n’ayisumbuye bigisha mu bigo by’amashuri byacu baba ari abakrisitu b’intangarugero ba Kiliziya Gatolika, kandi bagendera ku mahame yayo yose uko yakabaye. Iki cyemezo kizagirira akamaro Kiliziya Gatolika mu kuyiha isura nziza no guha isura nziza ibigo byacu muri rusange”

Asobanura impamvu z’iki cyemezo, Kardinali Ambongo yavuze ko bitewe n’uko Gatigisimu ari isomo ryigishwa mu bigo by’Abagatolika aho muri Congo, bizaba byiza kurushaho kuko umwarimu wese azaba ayizi bimufashe no kuyigisha abana mu buryo bworoshye.

Fridolin Ambongo yanijeje ko abatazakurikiza ayo mabwiriza yashyizweho na Kiliziya mu bigo byabo ibihano bikarishye bibategereje.

Biteganijwe ko iteka rya Kiliziya Gatolika rizatangira kubahirizwa kuwa 12 Ukwakira 2020 ari nabwo amashuri muri iki gihugu azaba yongeye gufungura imiryango.

 

Leave a Reply

Your email address will not be published. Required fields are marked *