Icyatumye barwanira igihangano cyamenyekanye

Umuhanzi Icyusa cy’Ingenzi Tchatching na Gihozo Credo Santos [Credo] barashyiditse bapfa indirimbo bombi baheruka gushyira hanze, buri umwe avuga ko ariye undi nawe ati “ni iyanjye!”

Indirimbo “Umutako utanaze” yabanje gushyirwa kuri Youtube n’umuhanzi Credo, ku wa 12 Kanama 2020. Umuhanzi Icyusa cy’Ingenzi ayishyiraho ku wa 11 Nzeri 2020.

Zombi zitandukanyijwe n’ikivugo cya Credo mu ndirimbo ye, ariko amagambo kuva ku munota wa mbere kugeza ku wa nyuma arasa. Zitandukaniye kandi ku bicurangisho birimo, ariko zose ni gakondo.

Ubutumwa bwose burimo buganisha ku rukundo, aho irimo ubutumwa bwo gutaka umukobwa. Hari nk’aho igira iti “Akira imbumbya muhorana mpuhwe, bihogo byiza impundu z’urwunge; Mutesi, Mutoni w’ababyeyi shenge. Mutako utanaze hahirwa njye ugukunda, hahirwa njye ugukunda kuko urabikwiye.”

Icyusa cy’Ingenzi Tchatching ubwo yashyiraga indirimbo hanze yabwiye IGIHE ko yari ayimaranye igihe kinini kuko yayanditse kera.

Credo avuga ko ‘Mutako utanaze’ yayihimbye mu 2018 yiga mu mashuri yisumbuye.

IGIHE yamubajije impamvu yiyitiriye indirimbo y’undi muhanzi avuga atari byo, ati “Iyi ndirimbo ni iyanjye. Ese hari ahantu wari uyizi ahubwo? Uwo nyirayo ntawe nzi ahubwo nshaka kumumenya.”

Icyusa cy’Ingenzi afite abatangabuhamya …

Icyusa cy’Ingenzi avuga ko album iriho ‘Umutako utanaze’ yayishyize muri Caritas ‘abantu barayigura’, ariko ko yayishyize kuri Youtube mu ntangiriro z’uku kwezi.

Asobanura ko uwaguze album ari we wumvise iyi ndirimbo kuko atigeze ayishyira ku mbuga zicururizwaho umuziki.

Uyu muhanzi anavuga ko akimara gusohora iyi album, yahuriye muri Canada n’umunyabigwi mu muziki Cécile Kayirebwa ayimujyanira i Burayi n’aho barayigura ndetse barayikunda cyane.

Umwe mu bantu bazi neza ko iyi ndirimbo ari iya Icyusa, harimo umuhanzi mugenzi we Cyusa Ibrahim nawe uririmba gakondo.

Uyu muhanzi yagize ati “Iyi ndirimbo ni iya Icyusa Cy’Ingenzi rwose! Ahubwo yatinze kuyishyira kuri Youtube. Mureke ibi bintu tubiharire abahanzi baririmba izindi ndirimbo zitari gakondo; tureke kuba bangamwabo.Twubahe abahanzi batubanjirije.”

Arongera ati “Iyi ndirimbo ni iye rwose abakunda gakondo abenshi murayizi. Njye nanga abarengana mpari. Iyi yayisohoye mu 2007 njye nyimenya mu 2008. Ahubwo tujye ducukumbura tumenye iby’ingenzi.”

Diogène Ntarindwa wamamaye nka Atome nawe ni umwe mu bahamya ko iyi ndirimbo ari iya Icyusa ndetse yabwiye IGIHE ko ayizi kuva kera ahubwo yatunguwe no kubona Credo ayiyitirira.

Bahuriye kuri RDB bagiye kwandikisha iyi ndirimbo …

Icyusa avuga ko ku wa Kabiri, tariki 15 Nzeri 2020 yakubiswe n’inkuba ubwo yahuriraga na Credo ku Rwego rw’Igihugu rw’Iterambere (RDB) bagiye kwandikisha iyi ndirimbo.

Aba bombi ntibari baziranye [gusa bigeze kwandikirana kuri WhatsApp uyu Credo abwira Icyusa ngo bazahure babiganireho], ariko umwe mu bantu bari kumwe na Icyusa cy’Ingenzi yamubwiye ko uwari ugiye kubanza kwandikisha iyi ndirimbo ari Credo.

Ati “Byarantunguye nkimara kubimenya. Ntabwo ari ibintu niyumvisha. Sinzi ukuntu byagenze ngo bihurirane kuriya. Nahise ntekereza ko ari gahunda y’Imana.”

Icyusa cy’Ingenzi yavuze ko yahise abwira uwari ugiye kubakira, ko we na Credo ikibagenza ari kimwe. Uyu wari ugiye kubakira, yababwiye ko iyi ndirimbo ishobora kugeza umwe muri bo imbere y’amategeko, abaha urupapuro buri umwe yuzuza agaragaza ko afite ibimenyetso by’uko indirimbo ari iye.

 

Leave a Reply

Your email address will not be published. Required fields are marked *