Gushyira abaturage mu byiciro byateje ikibazo

Muri kamwe mu duce inzego z’ibanze zatangirijemo igikorwa cyo gushyira abaturage mu byiciro bishya by’ubudehe mu Murenge wa Rugarama, Akarere ka Gatsibo, haravugwa abagabo n’abagore bihakana abo bashakanye cyangwa abana babo, bavuga ko badakwiriye kuba mu cyiciro kimwe bitewe n’uko babahemukira.

Ibi ni bimwe mu bibazo abaturage bashatse ko bikemurwa bakimara kumva ko umuntu udasangira inkono n’abo mu rugo rwe, agomba no guhabwa icyiciro cy’ubudehe cye.

Ngo umuhungu cyangwa umukobwa wicumbikiye utagisangira inkono n’iwabo, ntazabarurirwa hamwe na bo, kimwe nk’umugore cyangwa umugabo ufite abana ariko akaba atagaragaza uwo bashyingiranywe imbere y’amategeko nk’uko abakozi b’inzego z’ibanze bashinzwe gushyira abaturage mu byiciro bishya by’ubudehe bavuga.

Yvette Dusenge, Umuyobozi w’Ishami ry’iterambere ry’imibereho myiza mu Karere ka Gatsibo, avuga ko umuntu ugize urugo utazashyirwa mu cyiciro cy’ubudehe kimwe na rwo, ari umukozi waho kuko we abarurirwa iwabo aho avuka.

Ati: “Uwo mutabana afite inkono ye, umwana w’umusore (cyangwa umukobwa) niba hari ahantu yagiye akaba afite inzu ye, yitekera atabana n’umubyeyi we, arahabwa icyiciro cye n’ubwo aba ari ingaragu”.

Dusenge avuga ko niba hari umugabo cyangwa umugore uca inyuma uwo bashakanye akajya kuba mu rundi rugo, irangamimerere rye(mu ikoranabuhanga) riba rigaragaza ko hari aho afite uwo bashakanye, ku buryo adashobora kwibaruza kuri urwo rugo rushya yagiyemo ngo bimushobokere nk’uko iyi nkuru dukesha KTRadio ikomeza ivuga.

Ngo mu gihe kandi hari ushobora kuba afite abagore cyangwa abagabo barenze umwe, kandi bose nta n’umwe basezeranye mu mategeko, uwo muntu ngo ashobora kwihitaramo umwe muri izo nshuti ze akamwiyandikaho mu cyiciro kimwe cy’ubudehe.

Ibi bisobanuro ku byiciro bishya by’ubudehe hari abaturage byateye kwihakana abo bashakanye cyangwa abana babo, bavuga ko badakwiye kwibaruza mu cyiciro kimwe kuko ngo babahemukira.

 

Leave a Reply

Your email address will not be published. Required fields are marked *