Gukingira Covid 19 byatangiye mu Rwanda

Gahunda yo gukingira Covid-19 mu Rwanda yatangiriye ku bafite ibyago byo kwandura kurusha abandi by’umwihariko abita ku barwaye iyi virus mu mavuriro, nk’uko byatangajwe na minisiteri y’ubuzima.

Minisiteri y’ubuzima ivuga ko iri gukoresha inkingo zemewe na OMS/WHO u Rwanda rwabonye ku mubare muto “binyuze mu bufatanye mpuzamahanga”.

Minisiteri y’ubuzima ntiyatangaje ubwoko bw’urukingo ruri gutangwa, gusa umwe mu bakozi bayo yabwiye BBC ko batangiye gukingira muri iki cyumweru batera urukingo urwa Pfizer.

Muri aka karere iki gihugu nicyo gitangiye iyi gahunda mbere y’ibindi, muri Africa ibindi bihugu byatangiye gutanga urukingo birimo Algeria, Maroc, Mauritius, Equatorial Guinea, Misiri na Seychelles.

Abategetsi mu Rwanda bavuga ko muri uku kwezi biteguye kwakira inkingo zivuye muri gahunda mpuzamahanga ya Covax hamwe n’umuryango w’ubumwe bwa Africa.

Itangazo minisiteri y’ubuzima  rivuga ko izo nkingo niziboneka gahunda yo gukingira umubare w’abantu wisumbuyeho ari bwo izakurikiraho.

Ku munsi nk’uyu mu mwaka ushize, nibwo Misiri yatangaje umuntu wa mbere wanduye Covid-19, nibwo bwa mbere iyi ndwara yari igeze muri Africa.

Abashinzwe ubuzima mu Rwanda bavuga ko hamaze kuboneka abantu barenga 17,000 banduye iyi virus, na 239 yishe.

Ubu Africa ihanganye n’ubwiyongere bwihuse bw’abandura n’abicwa n’iki cyorezo muri iyi minsi kubera amoko mashya y’iyi virus.

Ibihugu byinshi muri Africa bitegereje kubona inkingo muri uku kwezi muri gahunda ya Covax.

Byinshi muri ibi bihugu bizabona urukingo rwa AstraZeneca, ibihugu bine gusa – birimo u Rwanda – nibyo bizabona urukingo rwa Pfizer rwakozwe n’Abanyamerika bafatanyije n’Abadage.

Urukingo rwa AstraZaneca byavuzwe ko ruhendutse ndetse rworoshye kubikwa kuko rushobora kubikwa mu byuma bisanzwe bikonjesha.

Gusa ibihugu bimwe, nka Africa y’Epfo, byakemanze ubushobozi bw’uru rukingo mu gukingira amoko mashya ya Covid-19.

 

 

Leave a Reply

Your email address will not be published. Required fields are marked *