Gatabazi yinjiye muri Guverinoma!

Kumara imyaka myinshi ku buyobozi bw’akarere ka Nyaruguru byatumye azamurwa mu ntera agirwa Guverineri w’Intara y’Iburengerazuba, yashimiye Perezida wa Repubulika, Paul Kagame wamugiriye icyizere, yizeza kuzakorana umwete.

Itangazo ryasohotse mu ijoro ryo kuri uyu wa Mbere tariki 15 Werurwe 2021, rigaragaza amavugururwa yakozwe muri Guverinoma no mu buyobozi bw’Intara zahawe ba Guverineri bashya.

Habitegeko François umaze imyaka irenga 10 ari Umuyobozi w’Akarere ka Nyaruguru, akaba yagizwe Guverineri w’Intara y’Iburengerazuba yari imaze igihe iyoborwa na Munyantwari Alphonse.

Mu butumwa yanyujije kuri Twitter, Habitegeko François yashimiye Perezida wa Repubulika, Paul Kagame.

Yagize ati “Ndanezerewe ku bw’icyizere mungiriye, Nyakubahwa Perezida wa Repubulika y’u Rwanda HE Paul Kagame, mukanshinga kuyobora intara y’uburengerazuba. Ndabizeza kuzakorana umwete, umurava, n’ubunyangamugayo. Imana yo mu ijuru ibyumve ibimfashemo.”

Gatabazi Jean Marie Vianney wari Guverineri w’Intara y’Amajyaruguru, na we yahinduriye imirimo, agirwa Minisitiri w’Ubutegetsi bw’Igihugu asimbuye Prof Shyaka Anastase wakuwe muri Guverinoma.

Gatabazi na we yashimiye Perezida Paul Kagame wongeye kumugirira icyizere, cyo kuba yazamuwe mu ntera.

Yagize ati “Ni ukuri mbashimiye mbikuye ku mutima nyakubahwa Perezida Paul Kagame kuba mwongeye kungirira cyizere kigeretse ku kindi munshinga kuyobora Minisiteri y’Ubutegetsi bw’Igihugu.”

Gatabazi yakomeje agira ati “nongeye kubizeza kutazigera mbatenguha cyangwa RPF. Nzaharanira impinduramatwara iganisha ku iterambere ryubaka u Rwanda twifuza.”

 

Leave a Reply

Your email address will not be published. Required fields are marked *