Yabitangarije mu kiganiro yagiriye ku Isezerano TV cyatambutse tariki ya 24 Werurwe 2021, ubwo yabazwaga uwo ari we.

Pasiteri Joel yagize ati: “Mu kumwe na Pastor Joel, umuhanuzi akaba n’umukiranutsi, mu ba none n’abatambutse ndakiranutse kubarusha. Barimo ba Aburahamu, ba Dawidi, ba Salomo.”

Yakomeje asobanura ati: “Mu by’ukuri, abantu bakwibaza bati ‘urabona, arizamuye yishyize hejuru’, bakurikire amateka yanjye yose, nta muntu ndaca amatwi, Petero yarayaciye, Aburahamu arongora umuja, sindaromgora umuja njyewe. Dawidi areba umugore w’abandi (muka Uriya), aramusambanya, arangije aranamwica, njye sindakora ibyo.”

Avuga ko ubu ngubu Imana imurebye, yasanga ari we muhanuzi w’ukuri. Ngo Imana yamushima kurusha Dawidi yigeze kubwira ko ari we ibonye urusha abandi gukiranuka.

Muri Bibiliya, Aburahamu afatwa nka Se, Sekuru cyangwa se Sekuruza w’abantu bose bafite ukwizera, Dawidi akaba yarabaye Umwami wa Isirayeli kimwe na Salomo wari umuhungu we, uzwi nk’umwami w’umunyabwenge mu mateka y’iki gihugu.

Amateka yabo yose agaragara mu bitabo birimo: Intangiriro, Abami na Samueli.