Dore impamvu yatumye uwahoze ari Depite wa Tanzanie adakomeza gufungirwa muri Kenya

Godbless Lema, wahoze ari umudepite muri Tanzania wari ufungiye kuri ‘station’ ya polisi i Nairobi muri Kenya kuva ejo ku cyumweru yarekuwe ngo asabe ubuhungiro, nk’uko byemejwe n’umunyamategeko we.

Zitto Kabwe wo mu batavuga rumwe n’ubutegetsi muri Tanzania, yatangaje ku rubuga rwa Twitter ko bari bafite ubwoba ko Kenya ishobora kumusubiza muri Tanzania.

Imiryango iharanira uburenganzira bwa muntu, nka Amnesty International, yari yamaganye gufungwa kwa Bwana Lema n’umuryango ubwo bari bageze muri Kenya, bahunze.

Bwana Lema yafashwe ari mu modoka atwawe n’umunyamategeko we bari kwerekeza i Nairobi. Yari kumwe n’umugore we n’abana.

Muri Tanzania hari ibikorwa bimwe byo kwibasira abatavuga rumwe n’ubutegetsi nyuma y’amatora Perezida John Magufuli yatsinze ku bwiganze.

Ikinyamakuru the Standard cyavuze ko polisi ya Kenya yafashe aba bantu bageze mu mujyi uri ku ntera ya 45Km uvuye ku mupaka wa Tanzania binjiye muri Kenya.

Hari amakuru yavuze ko uyu mugabo wari umudepite mu nteko ya Tanzania yanze guha urwandiko rwe rw’inzira (passport) abakozi bo ku mupaka ba Tanzania.

Umunyamategeko we, George Luchiri Wajackoyah, yasubiwemo n’iki kinyamakuru avuga ko yari ajyanye uyu munyapolitiki ku biro bya UNHCR i Nairobi.

Iki kinyamakuru gusibiramo kandi amagambo ya Bwana Lema avuga ko yazanye n’abana be batatu n’umugore we. Akaba ari “gusaba ubuhungiro”.

Bwana Lema yari mu bakuru b’ishyaka CHADEMA ritavuga rumwe n’ubutegetsi bafunzwe bakarekurwa mu cyumweru gishize, bashinjwaga gutegura imyigaragambyo yo gusaba ko amatora asubirwamo.

 

Leave a Reply

Your email address will not be published. Required fields are marked *