Covid 19 itumye ya masengesho yo gusabira igihugu ahagarikwa

Umuryango Rwanda Leaders Fellowship usanzwe utegura Igikorwa cy’amasengesho yo gusengera igihugu watangaje ko ayari ateganyijwe muri Mutarama 2021 yahagaritswe kubera icyorezo cya COVID-19.

Aya masengesho azwi nka ‘The National Prayer Breakfast’ asanzwe aba muri Mutarama agahuriza hamwe abayobozi muri Guverinoma, abikorera ku giti cyabo n’abagize sosiyete sivile.

Ni amasengesho ngarukamwaka aba agamije gushimira Imana ibyo yagejeje ku Rwanda mu mwaka urangiye no kuyiragiza umushya uba ugiye gutangira.

Umwe mu bagize Komite Nshingwabikorwa ya Rwanda Leaders Fellowship, Rev. Canon Dr Antoine Rutayisire, yabwiye The NewTimes ko aya masengesho yari ateganyijwe kuba ku nshuro ya 25 yahagaritswe kubera COVID-19.

Yagize ati “Nyuma y’isesengura ku kwiyongera kw’abandura COVID-19 mu gihugu, twahagaritse iki gikorwa ngarukamwaka.”

Dr Antoine Rutayisire yakomeje avuga ko iki gikorwa cy’amasengesho cyatangiye bwa mbere tariki 1 Nzeri 1995 kizongera gutegurwa neza ubwo igihugu kizaba cyamaze kunesha COVID-19.

Kubera umubare w’abandura icyorezo cya COVID-19 n’uw’abo gihitana ukomeje kwiyongera Inama y’Abaminisitiri yateranye ku wa 4 Mutarama 2021 yongeye gukaza ingamba zo kwirinda, ihagarika ingendo hagati y’uturere ndetse itegeka ko ibikorwa by’abikorera bizajya bifunga saa Kumi n’ebyiri z’umugoroba, abikorera na Leta bigakoresha 30% by’abakozi bose abandi bagakorera mu rugo.

Ni icyemezo kije nyuma yo kubona ko iki cyorezo kigenda kirushaho gukaza umurego dore ko mu bantu 105 kimaze guhitana abasaga kimwe cya kabiri bapfuye mu gihe cy’ukwezi kumwe kwa 12.

Kuva COVID-19 yagera bwa mbere mu Rwanda, abantu 8848 barayanduye mu bipimo 741 036 byafashwe, muri bo abagera ku 6816 barayikize mu gihe 1927 bakitabwaho n’abaganga.

 

Leave a Reply

Your email address will not be published. Required fields are marked *