Byemejwe Gakwaya yabenze uwo yatereye ivi! ubundi baba bari mu biki?

Gakwaya Célestin wamamaye muri sinema Nyarwanda ndetse akaba umwe mu bakinnyi ba Filime ya ‘Sakabaka’ yashyize hanze integuza y’ubukwe bwe, yatunguye benshi kuko itariho amazina y’umukobwa yari aherutse kwambika impeta mu ntangiriro z’uyu mwaka.

Ku wa 13 Werurwe 2020 muri Classic Hotel, Gakwaya yakoranyije inshuti n’imiryango abereka umukobwa yihebeye, yashimangiye iby’urukundo rwabo ubwo yafataga umwanzuro wo gutera ivi akamwambika impeta.

Wari umunsi w’umunezero, ibinezaneza ari byose kuri uyu mukobwa ndetse no kuri Gakwaya, kuko aho yari yicaye wabonaga ku maso akeye kandi akanyamuneza ari kose.

Uyu wari umukunzi we, Rudasingwa Daniella bari barahuriye no muri Filime ’Ijuru tuvuga.’

Ibyishimo byari byose ubwo yamwambikaga impeta cyane ko yavugaga ko noneho yabonye ugiye kuba icyuzuzo cy’umutima we, akamumara intimba ndetse uko abyutse akamureba mu maso yavugaga ko ‘ari inzobe idahanda’.

Ubwo yateraga ivi yanditse kuri Instagram agaragaza ibyishimo, ati “Uyu munsi Umutesi utetera umukunda akitwa inzobe idahanda isobetse inzobe inyoye, tetero ryiza akitwa rucyerereza bagenzi bagahusha icyerecyezo barangajwe n’ubwiza bwe, ati ‘yego ndabyemeye’. Nanjye nti ‘mbaye umunyamahirwe yo kwitwa umukunzi n’umwari mwiza nyir’uburanga buhebuje.”

Iby’uru rukundo ariko ntibyatinze nk’uko abasobanura filime bajya babivuga! Kuko ubu byasandaye ndetse bombi bahitamo gutandukana bucece ku buryo ubu Gakwaya yahisemo kwishumbusha ikindi kizungerezi bagiye no kurushinga vuba aha.

Mu ntangiriro z’iki cyumweru, Gakwaya yashyize haze integuza y’ubukwe bwe ndetse hariho n’amatariki buzaberaho.

Kuri iyi ntenguza yatunguye benshi, hagaragaraho ko agiye kurushinga n’umukobwa witwa Mutesi Mooren, ubukwe bwabo buteganyijwe kuba tariki 12 Ukuboza 2020, gusa aho buzabera ntihatangajwe.

Gakwaya w’imyaka 43 y’amavuko ni umwe mu bakinnyi ba filime bakomeye mu Rwanda. Benshi bamuzi nk’umwe mu bakina ari umugabo w’amashagaga n’umujinya uvanzemo ubugome ku buryo hari bamwe bahura nawe bagafumyamo bazi ko no mu buzima busanzwe ari ko ameze.

Yamamaye muri filime zitandukanye zirimo ‘Sakabaka’, ‘Serwakira’ n’izindi nyinshi zatumye benshi bamumenya.

Agiye gushakana na Mutesi Mooren, nyuma kandi y’uko yari yaratandukanye n’umugore wa mbere banabyaranye abana babiri.

 

Leave a Reply

Your email address will not be published. Required fields are marked *