Ba basitari bakase igitsina cya mugenzi wabo bagabanyirijwe ibihano

Kuri uyu wa Mbere, Zaina Namiro na bagenzi be bari bakatiwe imyaka 25 y’igifungo bazira kwangiza imyanya ndangagitsina y’umukobwa mugenzi wabo witwa Mukamana Sandrine, bagabanyirijwe igihano bakatirwa imyaka 15 nyuma yo kujurira.

Abaregwaga ni Namiro Zaina, Umurisa Gisele, Uwimana Zainabo, Umuhoza Rosine, Mutoni Hadidjah, Muhoza Connie na Kamanzi Cyiza.

Ku itariki ya 17 Werurwe 2020, nibwo Urukiko Rwisumbuye rwa Nyarugenge rwabahamije icyaha cy’ubwinjiracyaha bw’ubwicanyi rubahanisha igihano cy’igifungo cy’imyaka 25 n’ihazabu ya 4 470 425 Frw, runategeka ko na Telephone z’abaregwa 6 zigomba gutezwa cyamunara, amafaranga azivuyemo akajyanwa mu kigo cy’igihugu cy’imisoro n’amahoro.

Mu gusoma icyemezo cy’Urukiko uyu munsi, Umucanza yavuze ko urukiko rwasanze ibyasabwe byo guhindura inyito y’icyaha bifite ishingiro, avuga ko rwasanze bariya bantu bahamwa n’icyaha cyo gukubita no gukomeretsa bikabije.

Ubushinjacyaha bwaburanye ubu bujurire, bwari bwabwiye Urukiko Rukuru ko rubakurikiranyeho icyaha cyo gukubita no gukomeretsa bikabije aho kuba icyaha cy’ubwinjiracyaha mu kwica bari bahamijwe na ruriya rukiko rwababuranishije mbere.

Ubushinjacyaha bukaba bwavuze ko bwabuze ibimenyetso kuri kiriya cyaha cy’ubwinjiracyaha bw’ubwicanyi.

Umucamanza yahise abahanisha igifungo cy’imyaka 15 n’ihazabu ya miliyoni 3 Frw kuri buri muntu.

Icyemezo cyasomwe nta muburanyi n’umwe uri mu cyumba cy’iburanisha cyangwa ngo babe babikurikiranira ku ikoranabuhanga rya Video Conference gusa bamwe mu bo mu miryango y’abaregwa bagaragaraga mu cyumba cy’iburanisha.

Abaregwa bo bavugaga ko igihano bahawe n’Urukiko Rwisumbuye rwa Nyarugenge kiremereye ndetse ko kitajyanye n’ibikorwa bakoze dore ko ngo uwo baregwa gukubita yakize ndetse ubu akaba ameze neza.

 

Leave a Reply

Your email address will not be published. Required fields are marked *