Akarere ka Musanze kasubijwe kuri saamoya kubera covid 19

Minisiteri y’Ubuzima yatangaje ko kuba Umujyi wa Musanze wahawe ingamba zihariye zo gukurikiza mu gukumira ikwirakwira rya Covid-19 bijyanye n’uko umaze igihe ugaragaramo ubwandu buri hejuru kurusha ibindi bice.

Inama y’Abaminisitiri yateranye ku wa 14 Ukuboza 2020, yashyizeho ingamba nshya zigamije gukumira ubwiyongere bw’icyorezo cya Coronavirus, gusa ni ingamba zigaragaramo umwihariko wahawe Umujyi wa Musanze ugereranyije n’ibindi bice bitandukanye by’igihugu.

Mu ngamba zihariye zafatiwe Umujyi wa Musanze harimo ko ingendo zibujijwe guhera saa moya z’ijoro kugeza saa kumi za mu gitondo mu gihe ahandi zibujijwe guhera saa mbiri z’ijoro, harimo kandi ko inama zibujijwe mu gihe cy’ibyumweru bitatu uhereye ku itariki ya 15 Ukuboza 2020.

Izi ngamba zigena kandi ko muri uyu mujyi imihango yo gushyingura itagomba kurenza abantu 30 mu gihe mu bindi bice by’igihugu ari 50.

Umunyamabanga wa Leta muri Minisiteri y’Ubuzima, Dr Mpunga Tharcisse, yabwiye Radio Rwanda ko Musanze yahawe umwihariko kubera ubwandu bumaze iminsi buhagaragara.

Yagize ati “Muri ibi byumweru bibiri, ubushakashatsi twagiye dukora dupima abantu batandukanye mu bice bitandukanye Musanze ifite umwihariko w’uko ifite ubwandu buri hejuru cyane ugereranyije na 13% by’abantu bose banduye niho bwaturutse, bivuze ko ubwandu buri ku rwego rurenze ahandi hose mu gihugu. Izi ngamba zihariye za Musanze zagiyeho kugira ngo tugabanye ubu bwandu burusheho gukumirwa.”

Uretse kuba hari ubwandu bwinshi Dr Mpunga yagaragaje ko Musanze ari n’umujyi uhuriramo abantu benshi ku buryo bishobora kuba intandaro yo kwanduzanya iki cyorezo.

Ati “Musanze ni umujyi wihariye mu busanzwe uhuriramo abantu benshi batandukanye ari abava mu gihugu bose bakunda guhurirayo cyane hari nk’abakorerayo inama zitandukanye ni Umujyi w’ubukerarugendo ujyamo abantu benshi.”

“Urebye ni n’umujyi uhuriramo abantu bambukiranya imipaka bava za Congo bajya Uganda, Kenya cyangwa bava Uganda baza mu gihgu benshi bakunda kwinjirira muri Musanze. Ni ahantu rero hahurira abantu benshi batandukanye baturutse mu bice bitandukanye.”

Ingamba zizubahirizwa mu gihugu hose

  1. Kuva ku itariki ya 15 kugeza ku wa 21 Ukuboza 2020, ingendo zirabujijwe guhera saa Tatu z’ijoro (9:00 pm) kugeza saa Kumi za mu gitondo (4:00 am).
  2. Kuva ku itariki ya 22 Ukuboza 2020 kugeza ku wa 4 Mutarama 2021, ingendo zirabujijwe guhera saa Mbili z’ijoro (8:00 pm) kugeza saa Kumi za mu gitondo (4:00 am).
  3. Amateraniro rusange harimo imihango y’ubukwe, ubusabane n’ibirori bitandukanye byaba ibibera mu ngo cyangwa ahandi hose birabujijwe.
  4. Umubare w’abitabira inama (meetings and conferences) ntugomba kurenga 30% by’ubushobozi bwo kwakira abantu bw’aho bateranira. Bose bagomba kubanza kwipimisha COVID-19 kandi bakubahiriza amabwiriza y’inzego z’ubuzima.
  5. Ibikorwa by’inzego za Leta n’abikorera bizakomeza ariko buri rwego rurasabwa gukoresha abakozi batarenze 30% by’abakozi bose, abandi bagakorera mu rugo ariko bakagenda basimburana.
  6. Imodoka zitwara abantu mu buryo bwa rusange zemerewe gutwara 50% by’umubare w’abantu zemerewe gutwara kandi hakubahirizwa amabwiriza yo kwirinda COVID-19.
  7. Insengero zahawe uburenganzira bwo gukora kuko zujuje ibisabwa mu kwirinda COVID-19, zemerewe kwakira 50% by’ubushobozi bwazo bwo kwakira abantu, inshuro imwe mu cyumweru.
  8. Imihango yo gushyingura ntigomba kurenza abantu 50.
  9. Umubare w’abitabira ikiriyo ntugo,ba kurenga abantu 15 icyarimwe.
  10. Imyitozo ngororamubiri ikorerwa mu nyubako z’imyidagaduro (gyms) no kogera muri pisine (swimming pool) birabujijwe. Icyakora abantu bacumbitse muri hoteli bemerewe gukora izo siporo zombi kuri hoteli bacumbitsemo ariko berekanye ko bipimishije COVID-19.
  11. Imikino ya Shampiyona y’Igihugu y’Umupira w’amaguru hamwe n’imyitozo y’abakinnyi birahagaritswe. Icyakora amakipe y’umupira w’amaguru ari mu marushanwa mpuzahanga yo yemerewe gukomeza kuyitabira.

 

Leave a Reply

Your email address will not be published. Required fields are marked *