Akabyeri katumye abanyeshuri bo muri kaminuza bafatwa mu nkubiri ya Covid19

Polisi y’u Rwanda ikorera mu karere ka Nyanza yafashe urubyiruko umunani rwarenze kumabwiriza yo kwirinda icyorezo Covid-19 aho bafatiwe  mu kabari,  bamwe muri bo bemera ko banywaga inzoga.

Nyanza: Abanyeshuri biga muri Kaminuza bari mu rubyiruko 8 rwafatiwe mu kabari

Ruriya rubyiruko rwose rwemera ko  bafashwe amasaha yo kuba buri wese ari mu rugo yarenze mu rwego rwo kwirinda icyorezo Covid-19, bahawe ibihano birimo gucibwa amande angana na Frw 10,000 kuri buri umwe harimo no kurazwa kuri Polisi station ya Busasamana mu karere ka Nyanza.

Fulgence Habarurema  avuga ko akora ubucuruzi bw’ibinyobwa n’ibiribwa.

Ati “Abakiriya baje batubwira ko bari baburaye batanga komande natwe tubabwira ko tubapfunyikira ibyo kurya bari batubwiye bakabitwara, ducyererwa amasaha yagenwe nibwo inzego z’umutekano zaje saa moya n’igice z’ijoro.”

Bane mu munani bafashwe  ni abanyeshuri muri Kaminuza.

Mpazimaka Serge avuga ko Polisi ikiza kubafata bagize ubwoba bakagerageza no kwikingirana mu nzu barimo. Ati “Nafatiwe mu kabari ndi kunywa inzoga inzego z’umutekano zije tugira ubwoba tubanza kwanga gufungura kuko tukibabona twahise twikingirana.”

Umuyobozi w’Akarere ka Nyanza wungirije ushinzwe iterambere n’ubukungu Patrick Kajyambere yibukije urubyiruko ko rukwiye kumva ko ari ngombwa gushikariza abantu

kwirinda icyorezo Covid-19 aho kuba intandaro yo kugikwirakwiza.

Ati “Bariya ni abanyeshuri muri Kaminuza bafite imyumvire iri hejuru bityo bakwiye gushishikariza abandi kwirinda icyorezo Covid-19 aho kujya mu kabari kuko na byo bishobora kugikwirakwiza.”

Imibare itangwa n’ubuyobozi bw’Akarere ka Nyanza abarenga 4000 bamaze gufatwa barenze ku mabwiriza yo kwirinda icyorezo Covid-19 bose baciwe amande  arenga miliyoni 45Frw.

Urubyiruko rwafashwe none  rusaba abandi kubahiriza amategeko bityo rugasaba imbabazi ko ibyabaye bitazongera kuko bitanahesheje ishema Urubyiruko kumva ko rukwiye gufatirwa mu kabari rwarenze ku mabwiriza yo kwirinda icyorezo Covid-19.

CP John Bosco Kabera Umuvigizi wa Polisi ku rwego rw’Igihugu avuga ko abantu 117 630 bafashwe mu byumweru bibiri barenz eku mabwiriza yo kwirinda Covid-19, arimo gukora ibikorwa bitemwe, kutambara neza agapfukamunwa n’ibindi.

 

Leave a Reply

Your email address will not be published. Required fields are marked *