Afurika yikanze iki ko igiye guhingisha urumogi ku bwinshi?

Inteko Ishinga Amategeko ya Zambia yemeje umushinga w’itegeko rijyanye n’ihingwa ry’urumogi ruzajya rukoreshwa mu buvuzi n’ubushakashatsi gusa.

Xinhua yatangaje ko itegeko ryo guhinga iyo mari ishyushye iri kwemerwa n’ibihugu byinshi nyuma yo gukurwa ku rutonde rw’ibiyobyabwenge bihambaye mu Ukuboza 2020, ryemerejwe mu nama y’iyo Nteko rusange yateranye kuwa 1 Werurwe 2021 hifashishijwe ikoranabuhanga.

Umuvugizi wa guverinoma ya Zambia, Dora Siliya, yavuze ko uwo mushinga ukubiyemo amabwiriza y’uko ruzahingwa, kurutunganya, kurubika no kurukoresha mu buvuzi n’ubushakashatsi.

Siliya yakomeje avuga ko ihingwa ry’urumogi ryemewe n’amategeko rizagira uruhare rukomeye mu guteza imbere ubukungu n’ubuvuzi bw’icyo gihugu.

Iyo Nteko yanemeje umushinga w’itegeko ryemerera inganda guhinga no gutunganya igihingwa kizwi nka chanvre industriel kijya kumera nk’urumogi, gisanzwe gikorwamo impapuro n’ibindi bikoresho by’ubwubatsi.

Guverinoma ya Maroc yashyikirije Inteko Ishinga Amategeko umushinga w’itegeko ryo guhinga igihingwa cya ‘Cannabis’ kizwi nk’urumogi mu Kinyarwanda, ikajya itunganywa n’inganda ikifashishwa mu buvuzi.

Reuters yatangaje ko ku wa Kane w’iki Cyumweru ari bwo uwo mushinga wagejejwe ku Nteko Ishinga Amategeko kugira ngo usesengurwe, maze mu cyumweru gitaha utorwe.

Ni umushinga witezweho gufasha abahinzi bo mu Majyaruguru y’icyo gihugu gukirigita ifaranga, cyane ko bari bamaze igihe kinini baruhinga ariko ntirubateze imbere kuko abarubagurishiriza mu bu buryo bwa magendu babaha amafaranga y’intica ntikize.

Amakuru avuga ko muri miliyari 15$ zigurwa urumogi rwavuye muri icyo gihugu ku mwaka, miliyari 14.5$ zose ziribwa n’abarubagurishiriza gusa. Ubwo miliyoni 500$ ni zo zonyine abo bahinzi basaranganywa.

Amategeko yo muri Maroc avuga ko itemera urumogi, ariko mu Majyaruguru yayo rurahahingwa ndetse ishyirwa ku mwanya wa kabiri nyuma ya Leta Zunze Ubumwe za Amerika mu bihugu biturukamo urumogi rwinshi ku Isi, nk’uko Civilized ibitangaza.

Icyakora mu mwaka wa 2003, ubuso ruhingwaho muri icyo gihugu bwaragabanyijwe buva kuri hegitari 134 000 bugera kuri hegitari 47 000.

Iryo tegeko niritorwa, rizanagena uburyo bwo kugenzura ubuhinzi n’ubucuruzi bwarwo, kandi kurukoresha bitari mu buvuzi ntibizaba byemewe no mu nganda.

Igitekerezo cyo guhinga urumogi byemewe n’amategeko cyari kimaze igihe kinini gifitwe na bamwe mu badepite, ariko abandi benshi bakagitambamira. Nyuma y’uko Umuryango w’Abibumbye urukuye ku rutonde rw’ibiyobyabwenge bihambaye, bamwe mu bagitambamiraga bahise bashyigikira ko rutangira guhingwa.

Maroc niyemeza uwo mushinga w’itegeko, iraba yiyongeye kuri Afurika y’Epfo, Lesotho ,Zambia na Zimbabwe byarwemeye muri Afurika, n’ibindi bihugu byo hirya no hino ku Isi birimo Canada, u Buholandi, Espagne,u Bubiligi, Leta zunze Ubumwe za Amerika na Uruguay.

Guverinoma y’u Rwanda nayo iherutse kwemeza umushinga w’itegeko ryo guhinga urumogi rukajya rwoherezwa mu mahanga, ariko nturatangira gushyirwa mu bikorwa.

 

Leave a Reply

Your email address will not be published. Required fields are marked *