Abiyonkoye ku badive bafashwe basenga binyuranye n’amabwiriza

Abaturage 16 bo mu Karere ka Ngoma babarizwa mu Itorero ritaremerwa n’amategeko rivuga ko ryiyomoye ku badiventiste b’umunsi wa karindwi bafatiwe mu rugo rw’umuturage bari gusenga barenze ku mabwiriza yo kwirinda COVID-19.

Bafatiwe mu Mudugudu wa Cyanama mu Kagari ka Mutsindo mu Murenge wa Gashanda uherereye mu Karere ka Ngoma.

Aba baturage basanzwe basengera mu rugo rw’umuturage witwa Shirimpaka Jean Bosco ufite imyaka 60 y’amavuko. Abafashwe bose ni 16 bakaba basanzwe basenga batubahiriza amabwiriza yo kwirinda COVID-19.

Umunyamabanga Nshingwabikorwa w’Umurenge wa Gashanda, Buhiga Josue yabwiye IGIHE dukesha iyi nkuru ko aba baturage bafashwe ku bufatanye bw’inzego z’umutekano n’abaturage.

Yagize ati “ Ni abaturage 16, Itorero ryabo bavuga ko ryiyomoye ku badivantiste kuri ubu iryo torero ntabwo riremerwa, usanga basenga mu matsinda y’abantu bake bake. Twabafashe hagati ya Saa tanu na Saa Sita z’amanywa nyuma y’aho abaturage batubwiye ko bari gusenga batubahirije amabwiriza muri ibi bihe.”

Gitifu Buhiga yavuze ko abafashwe barimo abagabo n’abagore aho ngo bahise bajyanwa ku Murenge basubirirwamo amabwiriza basabwa kubahiriza barongera barigishwa ngo nyuma bacibwa amande bararekurwa.

Ati “ Batwemereye ko bagiye kwisubiraho bakubahiriza amabwiriza, nyiri urugo basengeragamo yaciwe 50 000 Frw abandi baturage bacibwa 2 000 Frw bararekurwa.”

Yakomeje asaba abaturage kugerageza kubahiriza amabwiriza yo kwirinda COVID-19 kuko ari icyorezo cyandura mu buryo bwihuse kandi ko kimaze kwica abantu benshi, yasabye abaturage kandi kwirinda kwirara kuko iki cyorezo ntaho kitagera haba mu Mujyi cyangwa mu giturage.

Akarere ka Ngoma ni kamwe mu tumaze iminsi tugaragaramo abarwayi bashya benshi mu cyumweru kimwe hakaba haranduye abantu 107 nkuko bigaragazwa n’imibare itangwa na minisiteri y’ubuzima.

 

Leave a Reply

Your email address will not be published. Required fields are marked *