Abigaragambije bapfuye muri Uganda bagera kuri 45

Polisi ya Uganda yavuze ko abapfuye mu myigaragambyo yo mu cyumweru gishize yo kwamagana ifatwa rya Bobi Wine, bageze kuri 45.

Mu kiganiro n’abanyamakuru kuri uyu wa mbere, umuvugizi wa polisi ya Uganda Fred Enanga yavuze ko abapfuye bagizwe n’abagabo 39 n’abagore batandatu.

Igitangazamakuru cyo muri Uganda cyasubiyemo amagambo y’abakora mu nzego z’umutekano bavuga ko benshi barashwe n’abakora mu nzego z’umutekano bambaye imyenda ya gisivile.

Abo bafashwe amashusho n’abaturage abagaragaza mu mihanda berekana imbunda bitwaje.

Ku wa gatanu, Minisitiri w’umutekano Jenerali Elly Tumwiine yabwiye itangazamakuru ko polisi n’izindi nzego z’umutekano bafite uburenganzira bwo kurasa no kwica, niba abigaragambya “bagejeje ku kigero runaka cy’urugomo”.

Polisi yavuze ko abapolisi 11 bagabweho ibitero bagakomeretswa n’abigaragambya.

Imyigaragambyo ya hato na hato yabaye mu murwa mukuru Kampala no mu yindi mijyi, basaba ifungurwa ry’umukandida-perezida Robert Kyagulanyi, uzwi nanone nka Bobi Wine, wari watawe muri yombi ari muri mitingi yo kwiyamamaza.

Nyuma yo gufungwa iminsi ibiri, yarezwe kurenga ku mategeko yo kwirinda coronavirus, afungurwa by’agateganyo. Ubu yasubiye mu bikorwa bye byo kwiyamamaza.

 

Leave a Reply

Your email address will not be published. Required fields are marked *