Abantu bakomeye muri Kongo bari kwicwa ankete zigafata ijoro!

Mu masaa tatu y’ijoro ryo kuri uyu wa 2 Werurwe 2021, abitwaje intwaro bataramenyekana bishe Maj. William Assani wari umugenzuzi w’Urukiko rw’igisirikare cya Repubulika ya Demukarasi ya Congo (RDC) ruri muri Teritwari ya Rutshuru.

Umuhanda warasiwemo ambasaderi w'ubutaliyani ni nawo wiciwemo Major william wari mu ngabo za RDC

Nk’uko amakuru aturuka muri RDC dukesha imbuga zirimo urwa Baromètre Sécuritaire du Kivu (Kivu Security) abivuga, imodoka yari itwaye Maj. Assani, yaguye mu gico cy’aba bitwaje intwaro, ubwo yageraga mu gace ka Katale muri Teritwari ya Rutshuru ivuye mu mujyi wa Goma.

Iki gitero kandi cyakomerekeyemo Komanda wa Regima 3409 mu ngabo za RDC, Col. Lumbu wari kumwe na Maj. Assani, umwe mu bakigabye na we ahasiga ubuzima.

Uyu muhanda wa Goma-Rutshuru ni wo abitwaje intwaro baherutse kurasiramo Ambasaderi w’u Butaliyani muri RDC, Luca Attanasio, umurinzi we n’umushoferi w’ishami ry’Umuryango w’Abibumbye rishinzwe ibiribwa (PAM), tariki ya 22 Gashyantare 2021, bose bakahasiga ubuzima.

Ambasaderi Attanasio n’aba babiri biciwe mu gace kitwa ‘Trois Antennes’ muri Gurupoma ya Kibumba, Teritwari ya Nyiragongo. Kivu Security ivuga ko gahana intera y’ibilometero bibarirwa muri 20 n’aho Maj. Assani yarasiwe.

Urupfu rw’aba bantu 4 mu gihe kitageze ku byumweru bibiri, rurashimangira ko uyu muhanda wa Goma-Rutshuru nta mutekano urimo, cyane ko iki gice kivugwaho gukoreramo imitwe yitwaje intwaro yo mu gihugu n’ikomoka mu mahanga.

 

Leave a Reply

Your email address will not be published. Required fields are marked *