Wagirango arahanura! saa moya

Ku munsi w’ejo nibwo byatangajwe ko Perezida Paul Kagame yayoboye Inama y’Abaminisitiri, yari igamije kwiga ku ngamba zo kwirinda Coronavirus; icyorezo cyugarije Isi muri iki gihe.

Ni inama benshi bari bategerezanyije amatsiko imyanzuro yayo kuko hari hashize iminsi imibare y’ubwandu bwa Coronavirus n’impfu byiyongera. Hari bamwe bari bahiye ubwoba bumva ko ‘Umujyi wa Kigali ushobora gushyirwa muri gahunda ya Guma mu Rugo’.

Benshi bayiraye ku ibaba ndetse bamwe ntibasinzira, barerekeje ku rubuga rwa Twitter rwa Primature bategereje kubona urupapuro rw’umuhondo. Ubu bamwe bari guhondobera kuko ubusanzwe bene urwo rupapuro rutangazwa mbere ya saa sita ariko kuri iyi nshuro rwashyizwe hanze saa kumi n’imwe z’igitondo zibura iminota irindwi.

Muri iyi myanzuro hari ahagira hati “Ingendo zirabujijwe guhera saa Moya z’ijoro (7:00 pm) kugeza saa Kumi n’imwe za mu gitondo (5:00 Am).” Muri make aya masaha yagabanyijwe avanwa saa tatu z’ijoro, nubwo hari na benshi bagaragazaga impungenge kuri iyi saha bavuga ko nayo ari kare.

Indi myanzuro isa nk’aho abantu batayitinzeho, saa moya aba ariyo itangira kugarukwaho cyane ku mbuga nkoranyambaga.

Ugiye mu ishakiro rya Twitter ukandikamo iri jambo utungurwa no kubona ibitekerezo byinshi by’abantu bagiye bavuga kuri iyi saha, gusa benshi babihuje n’indirimbo Bruce Melodie aheruka gushyira hanze yise gutyo n’ubundi.

Bruce Melodie asohora amashusho y’iyi ndirimbo yabwiye IGIHE ko ‘igitekerezo cyaje kubera ibi bihe byo gutaha kare’, none ibyo yaririmbye bibaye impamo!
Uwitwa Nikokeza Nate yanditse ati “Ibaze kugutahisha saa moya kandi nta n’umwana uri busange mu rugo! Melody! Melody! Reba udukozeho, ibintu byo kuririmba ngo saa moya uraba watashye reba utumye ba Minisitiri bumva ko bishoboka.”

Undi ati “Igiterekerezo cya Bruce Melodie cyakoze, twongeye gusubira kuri Saa Moya.”

Uwitwa Ndananiwe we yanditse ati “Ukuntu saa moya aribwo nabaga ngiye gukata umujyi. Ndababaye.” Uwitwa Bahati Ellie nawe ati “Hagire ubwira Bruce Melodie kuririmba indi ndirimbo kuko saa moya ye niyo idukozeho.”

Innocent Gatete ati “Ingamba nshya za Covid, murazigezwaho na Bruce Melodie. Mr Saa Moya.”

Indigo ati “Ko Bruce Melody yaririmbye saa moya leta ikaba ibikurikije. Nta kuntu Bruce Melody yadukorera remix ya saa moya akayita saa tanu.”

Muri iyi ndirimbo ya Bruce Melodie, aba avuga ko ku isaha ya saa moya ari bwo ari butahe akishimisha n’umukunzi we. Usibye kuba iri mu ndirimbo zikunzwe, hari n’abayinenze bavuga ko irimo amagambo ahembera ubusambanyi.

Umwe mu batanze igitekerezo kuri izi ngamba za Guverinoma, yavuze ko bitewe n’igisobanuro Saa moya ifite muri iki gihe, nk’umuyobozi watanze inama ko ingendo zashyirwa kuri iyo saha ashobora kuba yabivuze aseka.

 

Leave a Reply

Your email address will not be published. Required fields are marked *