Umwe mu bahanzi bo mu Rwanda ngo ntazongera guhatanira ibihembo, reba impamvu ibimuteye

Umuhanzi Uncle Austin yatangaje ko yamaze gufata icyemezo cyo kutazongera guhatanira igihembo icyo aricyo cyose mu muziki w’u Rwanda.

Ni icyemezo uyu mugabo avuga ko yafashe mu minsi ishize ubwo yari amaze kwitekerezaho asanga atajya ahatanira ibihembo n’abantu afasha, nk’umwe mu banyamakuru bamaze igihe ariko n’umuhanzi mukuru.

Ahereye kuri Kiss Summer Awards atajya ahatanira, Uncle Austin, yavuze ko kudahatanira ibi bihembo ari icyemezo yafashe nk’umuhanzi ariko unakora kuri Kiss Fm.

Avuga ko nubwo yatwara iki gihembo agikwiye, hari benshi bakwibaza impamvu agitwaye kandi akora kuri radiyo ibitegura.

Ati “Twese turabizi, nubwo nasohora indirimbo nziza gute igakundwa nkatwara iki gihembo ntabwo abantu bazabyumva bazavuga ko nacyihaye. Ndamutse ngitwaye byaba ikibazo kandi kitari ngombwa.”

Si Kiss Summer Awards gusa Uncle Austin atazitabira n’ibindi bihembo muri rusange ngo ntabwo azongera kubyitabira.

Yakomeje ati “Ni icyemezo nafashe, sinshaka kongera guhatanira igihembo icyo aricyo cyose cy’umuziki hano mu Rwanda.”

Impamvu y’iki cyemezo, Uncle Austin avuga ko cyatewe nuko ari umuhanzi mukuru usanzwe ufasha na bagenzi be.

Ati ”Hari igihe umuntu aba agikora umuziki ariko ari mukuru. Maze igihe mu muziki nubaka abahanzi batandukanye, sinakomeza guhanganira nabo ibihembo.”

Uyu muhanzi wigeze kwitabira Primus Guma Guma Super Star, avuga ko hagize irindi rushanwa iryo ariryo ryose ry’umuziki riza adashobora kuryitabira.

Nubwo ariko atazongera kwitabira amarushanwa ahuza abahanzi, Uncle Austin ngo ntahagaritse umuziki, azakomeza awukore anashimishe abakunzi be.

Uncle Austin mu buzima bwe abitse ibihembo bibiri by’umuziki. Mu 2018 yatwaye igihembo cy’indirimbo ifite amashusho meza mu byategurwaga na TV10, yanegukanye icy’umuhanzi mwiza mu baririmba Afrobeat [Best Afrobeat Artist] muri Salax Awards ya 2019.

 

 

Leave a Reply

Your email address will not be published. Required fields are marked *