Ubushinwa bwateye intambwe ikomeye mu guhashya Coronavirus bwahaye igihugu gikomeye muri Afurika inkunga ya Drones zizagifasha muri uru rugamba

Minisiteri y’Ubuzima muri Tunisia n’itsinda ryihariye ryashyiriweho kurwana n’Icyorezo cya COVID-19  byaraye byakiriye inkunga y’u Bushinwa y’indege zitagira abapirote (drones) zishobora gupima ubushyuhe bw’abantu zikaba zifite n’indangururamajwi zitanga ubutumwa bwo guhashya icyo cyorezo.

Tunisia igiye kwiyunga ku Rwanda, Ghana n’ibindi bihugu by’Afurka bikomeje kwifashisha drones mu gutanga ubutumwa bugenewe guhashya COVID-19 ndetse no gutwara amakuru y’ibipimo bya Laboratwari.

Nk’uko bitangazwa n’ikinyamakuru CGTN Africa, izo ndege zitagira abapirote zatanzwe n’Ikigo cyo mu Bushinwa hagamijwe kongerera ubushobozi Guverinoma ya Tunisia mu bijyanye no kurwanya COVID-19.

Uwo mushinga unashimangira ubufatanye bw’Ikigo cyUbushakashatsi cyo muri Tunisia n’Ikigo DJI cyo mu Bushinwa.

Biteganyijwe ko izo drones zigiye kwifashishwa mu gushyigikira ingamba za Leta ya Tunisia zigamije kwirinda icyorezo cya COVID-19, zikaba zigiye kugira umumaro ukomeye muri iki gihe abaturage bo muri Tunisia batemerewe kuva mu ngo.

Imibare yatanzwe n’inzego z’ubuzima igaragaza ko iki gihugu cyo mu Majyaruguru y’Afurika kimaze gutahurwamo abarwayi ba COVID-19 bagera kuri 939 barimo abahitanywe na cyo 38 n’abakize 207.

Ku mugabane w’Afurika hamaze gutahurwa abantu 31,933 banduye barimo 1,423 bapfuye na 9,566 bakize. Ku Isi yose umubare w’abanduye COVID-19 urasatira miriyoni eshatu  (2,944,068) barimo imfu 203,933 n’abamaze gukira 842,421.

Leave a Reply

Your email address will not be published. Required fields are marked *