Uburyo bwihuse bwo gupima Covid19 bwatangiye gukoreshwa mu Rwanda

Mu rwego rwo gupima abantu benshi kandi mu buryo bworoshye, Leta y’u Rwanda iri kwiga uburyo bushya bwo gupima Coronavirus bwa ‘Rapid Antigen Test’ (RAT) buzaza bwiyongera ku buryo bwa Polymerase Chain Reaction (PCR) busanzwe bukoreshwa.

Impamvu y’izi mpinduka, ni uko n’ubwo uburyo bwo gupima Coronavirus hifashishijwe (PCR) bwizewe ku kigero cya 98%, burahenze cyane kuko igipimo kimwe kigura 48 400 Frw.

Ku rundi ruhande, igipimo cya RAT kirahendutse, kuko kimwe gishobora kugura hagati ya 969 Frw na 4 844 Frw, kikaba cyoroshye kugikoresha ku buryo cyakoreshwa ahantu hahurira abantu benshi nko mu masoko, muri za gare z’imodoka n’ahandi henshi hatapimishwa ibipimo bisanzwe bya PCR.

Umuyobozi ushinzwe Ibikorwa byo guhangana na COVID-19, Dr. Menelas Nkeshimana, yabwiye Rwanda Today ko bidashoboka gupima abantu bose hakoreshejwe ibipimo bya PCR gusa.

Yagize ati “Nta gushidikanya ko abantu bose bazapimwa COVID-19 igihe ibipimo bya RAT twanatangiye gukoresha, byagaragaza ko bitanga ibisubizo by’ukuri kandi byuzuye. Icyo gihe rero abantu benshi mu gihugu bazipimisha niyo byaba buri cyumweru kuko igiciro cy’igipimo kizaba cyagabanutse.”

Dr. Mukeshimana yongeyeho ko “bitashoboka kugira ubushobozi bwo gupima buri wese uketsweho Coronavirus cyangwa ngo dukomeze gufata ibipimo byinshi dukoresheje PCR gusa.”

Igipimo cya RAT kiroroshye kugikoresha kuko umuntu ashobora kwipima kandi ibisubizo akabibona mu gihe gito. Ni ibipimo bitanga ibisubizo byizewe ku kigero cya 80%.

 

Leave a Reply

Your email address will not be published. Required fields are marked *