Twibagiwe kwifuriza umunsi mukuru abanyarwanda bahawe ubusaseridoti na Papa

Ku wa 7 Nzeri 1990 wari umunsi ukomeye, ubwo Papa Yohani Pawulo II yakandagiraga ku butaka bw’u Rwanda, mu ruzinduko abakirisitu Gatolika bafata nk’urw’amateka kugeza ubu.
Muri urwo ruzinduko rwamaze iminsi ibiri, ku wa 8 Nzeri 1990 Papa Yohani Pawulo II yahaye ubusaserdoti abadiyakoni 31, mu misa yabereye i Mbare, ni mu Murenge wa Shyogwe mu karere ka Muhanga.
Barimo 25 bo mu Rwanda na batandatu bo muri Repubulika ya Demokarasi ya Congo. Benshi muri bo ubu ntibakiriho, ariko mu bakiriho harimo babiri babaye abasenyeri. Abo ni Arkiyepiskopi wa Kigali Antoine Kambanda n’Umushumba wa Diyosezi ya Ruhengeri, Musenyeri Harorimana Vincent.
Musenyeri Kambanda yabwiye IGIHE ko bahabwa ubusaserdoti wari umunsi wamubereye urwibutso rukomeye ku butumwa yahawe.
Ati “Wari umunsi ukomeye cyane kuri twe, byabaye umugambi ukomeye wateguwe n’Imana, byonyine kuba Papa aribwo bwa mbere yari akandagije ikirenge ku butaka bw’u Rwanda akaduha ubusaserdoti.”
“Ubu noneho akarusho ni uko atakiri Papa gusa ahubwo yagizwe Umutagatifu, nk’umuntu watunganiye Imana, icyegera cyayo, aratuvuganira, ikindi twinjiye mu masekuru y’uwabuduhaye, nawe yabuhawe n’uwabumuhaye, ibisekuru bikagenda bikurikirana gutyo kugeza kuri Yezu Kristu n’intumwa, ukaba winjiye mu murongo w’Ubusaserodoti. Ibi byose ni ibintu dushimira Imana.”
Yasabye Abanyarwanda gukomeza kuzirikana umurage Papa Yohani Pawulo II yabasigiye, no kurengera ubuzima bihuye n’iki gihe bwugarijwe n’icyorezo cya Covid-19.
Musenyeri Harorimana na we agaragaza ko uruzinduko rwa Papa rwamubereye urwibutso rutazibagirana, ndetse ko kuri uyu munsi yizihiza isabukuru y’imyaka 30 ahawe ubusaserodototi, ari uw’ibyishimo no gushimira Imana kuko wahuriranye n’ivuka ry’Umubyeyi Bikiramariya.
Yavuze ko yishimira umurimo yakoze arera abandi basaserdoti, ku buryo bimutera ishema iyo abonye bamunyuze imbere uyu munsi nabo bafatanya umurimo w’Imana.

Leave a Reply

Your email address will not be published. Required fields are marked *