Rwanda Revenue Authority yiseguye kumuturage uherutse gucibwa amafaranga azizwa kuba atazi gusoma

Ikigo cy’ Igihugu cy’ Imisoro n’ amahoro Rwanda Revenue Authority cyasabye imbabazi umuturage witwa Nsabimana Dominique waciwe amafaranga y’ uko atazi gusoma.

Kuri uyu wa 12 Kanama 2019 nibwo ku rubuga rwa Twitter hagaragara imyemezabwishyu yatanzwe na RRA ivuga ko uwitwa Nsabimana Dominique yishyuye amafaranga ibihumbi 2 yaciwe kuko atazi gusoma.

Nsabimana Dominique wo mu murenge wa Nyakarenzo yaciwe 2000 frw kuko atazi gusoma

Mu butumwa RRA yashyize ku rubuga rwa Twitter yavuze ko uyu muturage yamaze gusubizwa amafaranga ye kuko ayo mande ntaho ateganyijwe mu itegeko.

“Turisegura kuri Bwana NSABIMANA Dominique waciwe amafaranga yiswe ayo kutamenya gusoma kuko ntaho ateganijwe mu itegeko. Ubu yamaze gusubizwa amafaranga ye, nyuma yuko RRA n’ akarere ka Rusizi basuzumye imiterere y’iki kibazo. Abakozi babikoze nabo barimo gukurikiranwa”.

Kayumba Ephrema, Umuyobozi w’ akarere ka Rusizi yabwiye Radio Isangano ko iki kibazo cyabaye kuri uyu muturage wenyine kuko bitakorewe mu mukwabu .

Ati “Ni uriya wenyine byabayeho, kuko ntabwo ari umukwabu wabaye ngo bajye gufata abantu batazi gusoma no kwandika, ahubwo bamufatanyije yari aje gusaba service, bamusabye gusoma urutonde rw’ibisabwa ntiyabasha kurusoma, bahita bamenya ko atazi gusoma no kwandika, bamubaza impamvu atagiye mu isomero ry’abakuze, kuko nta gisubizo yari afite bahita bamuca amande”.

Ikigo cy’ Igihugu cy’ imisoro n’ amahoro ni cyo kigo gihigura ibyo cyahize ku kigero kirenze 100%.

Leave a Reply

Your email address will not be published. Required fields are marked *