Rurageretse hagati ya shaddyboo na Rayon Sport

Abakunzi b’Ikipe ya Rayon Sports, bagaragarije uburakari bwinshi Mbabazi Shadia wamamaye ku mbuga nkoranyambaga nka Shaddyboo, nyuma yo kubagira inama batashimye y’icyakorwa kugira ngo ibibazo biri mu ikipe yabo bikemuke.

Ikipe ya Rayon Sports imaze igihe kinini mu bibazo ahanini bishingiye ku miyoborere, byatumye isa n’iba iciro ry’imigani ku buryo buri wese adatinya kugira icyo ayivugaho.

Izina ry’iyi kipe ikunzwe na benshi mu Rwanda bamwe barikoresha batebya, mu gihe abababajwe n’ibihe irimo bakunze gutambutsa ubutumwa bw’ibyo babona byakorwa kugira ngo iyi kipe y’igikundiro igaruke mu bihe byiza, n’ubwo icyemezo cya nyuma kiri hagati ya Minisiteri ya Siporo n’Urwego rw’Igihugu rw’Imiyoborere, RGB.

Abinyujije ku rubuga rwe rwa Twitter atamaze igihe kinini akoresha, Shaddyboo yavuze icyakorwa kugira ngo Rayon Sports yongere igire agahenge, mbere yo kotswa igitutu n’abafana bayo.

Shaddyboo yagize ati:”Igisubizo ku abafana ba Rayon na Sadate Munyakazi. Mukore udupfukamunwa mushyireho na sponsor (umuterankunga) muhe abafana batugure. Abafana ntabwo bazongera kuvuga kuko iminwa izaba ipfutse, Muzabona ayo guhemba abakinnyi, mu nyungu”.

Yunzemo ati:

“Muzandikeho Shaddyboo ku nkunga y’ibitekerezo”.

Abakunzi ba Rayon Sports ku rubuga rwa Twitter, bahise batsa umuriro kuri uyu mugore batangira kumwamaganira kure.

Uwitwa Semuhungu Fabrice yabajije icyo aba iyo avuze atekereje. Ati:”Ese mu busanzwe ni iyihe ngaruka umubiri wawe ugira iyo ufashe umwanya ugakoresha ubwonko? Jya ku murenge utuyemo wiyandikishe muri VUP na ho gushakira amaronko kuri Rayon Sports ubyibagirwe”.

Uwiyise Reka turye Show yagize ati:

“Ariko Shadia ibi bintu usigaye uvuga tuvuge ko Meddy saleh asigaye aneditinga ubwonko bwawe”.

Uwitwa Henry we yagize ati:

“Uyu mushinga wo kubyaza umusaruro twitter wawize nabi kbsa. Ugire wisubirire kuri IG ni ho bakoresha amafoto naho twitter isaba kuba ufite ibitekerezo bizima”.

Kalisa Kevin we yagize ati:

“Hahahh Rayon Sports igeze habi, kugeza aho Slayqeen ayimenyera igeno rya buri munsi! Sadate agomba kugenda”.

Laxalt yunzemo ati:

“Mukecu, ko ushaje wanduranya, wakwicaye hasi ukarera abana ibya Rayon ukabireka ko bitakugwa neza. Ubu ikipe yacu ushaka kuyambika ubusa nk’ubwo bwawe?”

Magingo aya nyuma y’uko ibibazo byo muri Rayon Sports bigejejwe kuri Perezida wa Repubulika, Paul Kagame, na we akabishyikiriza Minisiteri ya Siporo, iyo Minisiteri ku bufatanye na RGB ni bo bagomba kugena ahazaza h’iyi kipe bakunze kwita Gikundiro.

Leave a Reply

Your email address will not be published. Required fields are marked *