Mu Rwanda byahageze! Umugore yemeye gutwitira uwabuze urubyaro basaba urukiko kubyemeza

Urukiko Rwisumbuye rwa Nyarugenge rwemeje ishingiro ry’amasezerano imiryango ibiri yumvikanyeho, ko umwe uzatwitira undi mu rwego rwo gukemura ikibazo cyo kutabyara cyabaye kuri umwe muri iyo miryango.

Kuba umuntu yatwitira undi (Surrogacy) bikorwa hafatwa intanga z’umugore n’umugabo zigahurizwa muri laboratwari, hanyuma igi rigashyirwa muri nyababyeyi y’undi mugore agatwita, umwana uvutsemo akaba uwa ba nyir’intanga.

Mu minsi ishize umugabo w’imyaka 40 n’umugore we wa 33 bagannye Urukiko rw’ibanze rwa Kicukiro, basaba icyemezo cyerekana uzaba umubyeyi w’umwana nyuma y’uko babisabwe n’ibitaro bya Gisirikare bya Kanombe, bagannye babisaba guhuriza intanga zabo mu wundi mugore, ariko umwana akazaba uwabo.

Ni igitekerezo bagize nyuma yo kumara imyaka 10 bashakanye ariko barabuze urubyaro, bumvikana n’undi muryango w’umugabo n’umugore amafaranga bazabaha, hanyuma umugore w’uwo muryango akabatwitira.

Imiryango yombi yagiye ku bitaro bya Kanombe isaba muganga gufata intanga akazihuriza muri laboratwari, ubundi akazitera uwo mugore bari bumvikanye amafaranga. Ibitaro byasabye icyemezo cy’urukiko cyemeza uzaba umubyeyi w’umwana, hagati ya nyir’intanga n’uwamutwise akamubyara.

Ibyo nibyo byatumye bagana urukiko. Mu isomwa ry’umwanzuro w’urukiko ku wa 30 Kamena, umucamanza mu rukiko rwa Kicukiro yavuze ko nta ngingo ivuga ko kuba umuntu yatwitira undi ari inzira yo gushaka urubyaro mu mategeko y’u Rwanda.

Iki gikorwa nubwo kitabuzwaga mu mategeko y’u Rwanda, ntibyari bizwi niba kinemewe kuko ingingo ya 254 mu itegeko rigenga abantu n’umuryango mu Rwanda, ivuga ko kororoka bikorwa hagati y’umugabo n’umugore mu buryo busanzwe cyangwa bwifashishije ikoranabuhanga. Igika cya kabiri cy’iyo ngingo kivuga ko kororoka mu buryo bwifashishije ikoranabuhanga bigomba kuba byumvikanyweho n’abo bireba.

Umucamanza yavuze ko uburyo bwo gufashwa kubona urubyaro bwemewe bukorerwa umugabo n’umugore, aho kuba hagati y’imiryango ibiri. Abunganizi b’uwo muryango bo bavuze ko itegeko ryo mu 2016 rigenga abantu n’umuryango, ryemera ko kubyara bishobora kubaho habayeho gufashwa n’abaganga, “bisobanuye ko hashobora kubaho izindi mpande zitari umugore n’umugabo.”

Umuryango wahise ujurira Urukiko Rwisumbuye rwa Nyarugenge, kuri uyu wa Gatanu inkuru nziza itaha mu rugo rwabo.

Urukiko Rwisumbuye rwa Nyarugenge Nyarugenge rwemeje ishingiro ry’amasezerano iyo imiryango ibiri yumvikanyeho, ko umuryango umwe uzatwitira undi.

Uburyo bwo gutwitira undi bwatangijwe mu 1986 ubwo havukaga umwana wa mbere hakoreshejwe ubwo buryo. Bwahise butangira kwamamara mu bihugu cyane cyane ibyateye imbere, aho nko muri Leta Zunze Ubumwe za Amerika ku mwaka havuka abana bagera kuri 750 hakoreshejwe ubwo buryo.

 

Leave a Reply

Your email address will not be published. Required fields are marked *