Kayonza: Birukanwe ku kazi bazira kuba amakaye bakoreyeho ikizami yarabuze

Abakozi batatu bashinzwe imari mu mirenge ya Murundi, Mukarange na Rwinkwavu yo mu Karere ka Kayonza bahawe amabaruwa abirukana mu kazi nyuma y’igenzura ryakozwe bagasanga nta makaye bakoreyemo ibizami bibinjiza mu kazi.

Ni amabaruwa bahawe mu ntangiriro z’uku kwezi ndetse bategekwa guhita bahagarika akazi uhereye igihe baherewe ibaruwa.

Umuyobozi w’Akarere ka Kayonza, Murenzi Jean Claude yabwiye IGIHE ko mu igenzura ryakozwe na komisiyo ishinzwe abakozi ba leta ryasanzwe nta makaye bakoreyemo ibizami agaragara nyamara ay’abantu bavuga ko bakoranye ibizami yose akaba ahari.

Yagize ati “ Hari igenzura ryakozwe na komisiyo ishinzwe abakozi ba leta rigaragaza ko amakaye yabo atabonetse kugira ngo harebwe amanota babonye niyo mpamvu bavuye muri uwo mwanya.”

Abakozi birukanwe basanga bararenganyijwe

Abakozi birukanwe mu kazi babwiye IGIHE ko bararenganyijwe cyane kuko amakaye babazwa batigeze bayabika ahubwo yabitswe n’Akarere.

Ndayambaje Francois Xavier wari ushinzwe imari n’abakozi mu Murenge wa Rwinkwavu yagize ati “ Ibyo aribyo byose akarengane ko karimo kuko twebwe ntabwo aritwe dushinzwe kubika amakaye y’Akarere, twe baduhagaritse bavuga ko ari amakaye y’amanota yabuze ariko urumva umuntu amaze imyaka ibiri akora yaciye mu nzira zose z’ibizami kandi sitwe dushinzwe kubika amakaye batwirukaniye. Itegeko rivuga ko ari Akarere gashinzwe kubika ayo makaye none byatugizeho ingaruka, akarengane karigaragaza.”

Ndayambaje yavuze ko we na bagenzi be bamaze kwandikira ubuyobozi bw’Akarere nkuko biteganywa n’amategeko basaba kurenganurwa ngo nibidakemuka biteguye gukomeza kurega leta kuko birukanwe mu buryo bw’amayobera.

Nkurunziza Pascal wari ushinzwe imari n’abakozi mu Murenge wa Murundi we yagize ati “ Batubwiye ko amakaye twakoreyemo ibizamini ataboneka, ikizami twagikoze mu ntangiriro za 2018 tujya mu kazi mu Ukuboza 2018, ikizami nari nagitsinze ni nayo mpamvu banshyize mu kazi none nyuma y’imyaka ibiri bambwiye ko amakaye nakoreyemo ntayahari, sinzi aho byapfiriye ariko akarengane nakorewe karumvikana cyane.”

Muri Werurwe uyu mwaka abadepite bagize Komisiyo y’Imibereho myiza y’Abaturage mu Nteko Ishinga Amategeko bari basabye Ishyiramahamwe ry’Uturere n’Umujyi wa Kigali ( Ralga) gukurikirana mu buryo bwihutirwa abantu batanze amanota ku bakoze ikizamini mu turere twa Rwamagana na Kayonza, hakagaragaramo amanyanga.

Raporo ya Komisiyo Ishinzwe abakozi ba leta y’umwaka ushize, yagaragaje ko hari abantu bahawe amanota y’ibizamini mu myanya y’akazi muri utu turere, bikagaragara ko bahawe amanota menshi ugereranyije n’ayo bagombaga kubona.

 

Leave a Reply

Your email address will not be published. Required fields are marked *