Isata (Umuyaga udasanzwe) abanyarwanda ba kera bayikangishaga abana bayita impaca cyangwa baringa, noneho yakoze ibara mu karere ka Rubavu

Iki kiza cyibasiye abaturage ahagana saa cyenda mu tugari twa Buringo na Butaka. Uyu muyaga udasanzwe ukunze kwibasira aka gace bitewe n’ibirunga bikegereye.

Akagari ka Buringo mu murenge wa Bugeshi, kegeranye n’ishyamba ry’ibirunga kandi gateganye n’ibirunga nka Nyiragongo na Nyamuragira iri inyuma yayo, kakaba kari munsi ya Kalisimbi na Mikeno naho akagari ka Butaka kitegeye neza ibirunga nka Nyiragongo iri hakurya muri Congo.

Umunyamabanga Nshingwabikorwa w’umurenge wa Bugeshi, Rwibasira Jean Bosco yavuze ko uyu muyaga waturutse mu birunga, ahumuriza abagizweho ingaruka anabizeza ubufasha bwihuse.

Ati ’’Ni imiryango 11 mu kagari ka Buringo ni itandatu naho Butaka ni itanu twamenyesheje akarere mu minsi mike turabaha amabati, hano hari ikibazo cy’umuyaga udasanzwe uturuka mu misozi y’ibirunga, abasenyewe twabaye tubacumbikiye mu baturanyi, amabati naza inzu zabo ziraza gusanwa kuko inyinshi ni ibisenge byangiritse’’.

Uyu muyaga ukunze kwibasira uyu murenge wa Bugeshi, undi ukomeye ukaba waherukaga taliki ya 21/4/2014 ubwo imiryango 52 yo mu kagari ka Buringo yasenyewe n’umuyaga udasanzwe waje udaherekejwe n’imvura watwaye isakaro ry’inzu izindi zirasenyuka ndetse urimbura ibiti n’imyaka.

 

Leave a Reply

Your email address will not be published. Required fields are marked *