Inkunga y’udupfukamunwa kubakene

Ihuriro ry’inganda nyarwanda zikora udupfukamunwa kuri uyu wa Kane zatangije ku mugaragaro ubukangurambaga bwiswe ‘Mask for all’, bugamije gukusanya udupfukamunwa tugera kuri miliyoni enye mu byumweru bibiri tugahabwa abatishoboye badafite ubushobozi bwo kutugura hirya no hino mu gihugu.

Udupfukamunwa turakusanywa binyuze mu kwiyemeza kw’abantu ku giti cyabo, inzego za Leta, abikorera, za Ambasade n’ibigo mpuzamahanga n’abandi. Tuzahabwa abaturage bari mu cyiciro cya mbere n’icya kabiri cy’Ubudehe badafite ubushobozi bwo kutwigurira.

Abateguye ubu bukangurambaga bavuga ko igitekerezo cyabwo ari ukuziba icyuho kiri mu mu kurwanya ikwirakwira rya Coronavirus binyuze mu kwambara udupfukamunwa, aho usanga hari abatabasha kukambara cyangwa bakambara akatabarinda bitewe n’ubushobozi buke bwo kukagura uko bikwiye.

Bavuga ko nubwo hashyizweho amabwiriza yo kwambara udupfukamunwa, byagaragaye ko hari abatabasha kutugura bigatuma nk’umuryango w’abantu batanu batizanya kamwe, abandi ugasanga barambara udusa nabi dushobora kubatera izindi ndwara.

Habineza Emmanuel uhagarariye abakora udupfukamunwa yagize ati “Turahamagarira buri wese, buri kigo kugira uruhare muri ubu bukangurambaga kandi ndizera ko dushyize hamwe twabigeraho tukarwanyiriza hamwe Coronavirus dufasha abatabasha kwigurira udupfukamunwa”.

Umuyobozi Wungirije w’Ikigo cy’Igihugu cy’Iterambere (RDB), Niyonkuru Zephanie, atangiza ubu bukangurambaga, yashimiye abikorera uruhare bamaze kugira mu kugabanya uburyo igihugu cyatumizaga buri kimwe cyose hanze guhera ku gapfukamunwa, none ubu bakaba bazanye igitekerezo cyo kugeza kuri buri wese agapfukamunwa.

Yashimye ko ubu abikorera babasha gukora udupfukamunwa duhagije aho kuri ubu bamaze gukora uturenga miliyoni 10, yizeza ko binyuze muri ubu bukangurambaga, abantu badafite ubushobozi bwo kugura agapfukamunwa na bo kazabageraho.

Ati “Mu gihe dukomeje kurwanya ko icyorezo gikwirakwira, tugakomeza gukora ibishoboka byose ngo turengere ubuzima bw’abaturage ndetse n’ibikorwa by’ubukungu bikomeze, ni ingenzi cyane ko dushyira hamwe kugira ngo twizere ko uburyo bwo kwirinda buhari kandi bugera kuri buri wese”.

Niyonkuru ku giti cye yahise atanga udupfukamunwa 200 ndetse asezeranya ko na RDB izashyigikira iki gikorwa.

MTN Rwanda yatanze udupfukamunwa 10,000, Banki ya Kigali (BK) itanga udupfukamunwa 30 000. Ambasade y’u Budage mu Rwanda yatanze 34,000, Umuyobozi Mukuru wa I&M Bank Rwanda Plc, Robin Bairstow, yatanze udupfukamunwa 500.

Udupfukamunwa tuzatangwa buri minsi ibiri tuzajya dushyikirizwa abayobozi mu turere hanyuma abajyanama b’ubuzima batugeze ku baturage. Ubu bukangurambaga burareba buri wese aho yaba ari hose yaba mu gihugu no hanze.

Ushobora gutanga agapfukamunwa unyuze hano ukuzuza ifishi cyangwa ugahamagara.

 

Leave a Reply

Your email address will not be published. Required fields are marked *