Dore imirimo ihabwa abana

Ubu bushakashatsi bwakorewe muri Kicukiro, Nyarugenge, Gasabo, Nyagatare, Kirehe, Gicumbi, Musanze, Rubavu, Karongi, Nyamagabe na Huye muri Gashyantare na Gicurasi 2020.

Komisiyo yagaragaje ko mu bana 421 basanzwe mu mirimo ibujijwe, harimo 163 bafite hagati y’imyaka 13 na 15, bikorezwaga imitwaro iremereye barimo 151 b’abahungu. Abana 98 bakoreshwaga imirimo yo mu rugo ihemberwa muri bo 70 ni abakobwa.

Komisiyo y’uburenganzira bwa muntu ivuga ko “ubukene mu miryango abana bakomokamo ari imwe mu mpamvu zagaragajwe zituma abana bakoreshwa imirimo mibi mu Rwanda”.

Ibi bishimangirwa n’uko komisiyo yasanze 82.9% by’abana bakoreshwa imirimo mibi ari abo mu cyiciro cya mbere n’icya kabiri cy’Ubudehe. Ubupfubyi ni indi mpamvu yagaragaye ituma abana bakoreshwa imirimo ibujijwe.

Komisiyo iti “Amakimbirane yo mu miryango nayo byagaragaye ko atuma abana bajya mu mirimo ikoreshwa abana kuko mu gihe hari amakimbirane mu miryango abana bata imiryango yabo bakajya gushaka ubuzima mu buryo kwibeshaho no guhunga ayo makimbirane”.

Abakoze ubushakashatsi basanze 47% by’abana bakoreshwaga imirimo ibujijwe batiga. Iyi mirimo kandi igira ingaruka ku mikurire y’abana kuko 34% by’abana bakoreshwaga imirimo ibujijwe igikuriro cyabo cyari kitajyanye n’imyaka yabo.

Abana basanze mu mirimo kandi bagaragazaga ibimenyetso by’ihungabana ndetse n’umunaniro ukabije.

Komisiyo y’uburenganzira bwa muntu yasabye inzego zibifite mu nshingano kwita ku burere bw’umwana no kugira umuryango ushoboye kandi utekanye, gukurikirana uburezi n’uburere bw’abana, gufasha ababyeyi n’abaturage kumenya no kurengera uburenganzira bw’abana ndetse no guhana abatubahiriza uburenganzira bw’umwana.

Ingingo ya Gatandatu y’itegeko rigenga umurimo mu Rwanda, ivuga ko gukoresha umwana utarageza ku myaka cumi n’umunani (18) umwe muri iyi mirimo ikurikira birabujijwe:

Imirimo ihungabanya imiterere y’umubiri w’umwana;

Imirimo ikorerwa munsi y’ubutaka, munsi y’amazi, kandi harehare cyangwa hafunganye;

Imirimo ikoreshwa imashini n’ibikoresho bishobora kugira ingaruka mbi cyangwa isaba guterura no kwikorera umutwaro uremereye;

Imirimo ikorerwa ahantu hari ubushyuhe, ubukonje, urusaku, ibitigita n’ibindi byangiza ubuzima bw’umwana;

Imirimo ikorwa amasaha menshi, mu ijoro cyangwa ikorerwa ahantu hafunganye.

 

Leave a Reply

Your email address will not be published. Required fields are marked *