Bombori bombori muri ADEPR!

Rev Sibomana Jean wayoboye ADEPR yasabye itorero kumurenganura agasubizwa mu nshingano ze, akanahabwa ibigenerwa umukozi bigenwa n’amategeko ngengamikorere yaryo.

Uyu mugabo wabaye Umuvugizi wa ADEPR yakuwe kuri uwo mwanya mu 2017, nyuma y’uko we, Tom Rwagasana wari umwungirije n’abandi bantu 10 bafunzwe bakurikiranyweho ibyaha birimo kunyereza umutungo w’itorero.

Ku wa 27 Gicurasi 2017 nibwo Sibomana yatawe muri yombi, ku wa 22 Nzeri 2017 afungurwa by’agateganyo ku mpamvu z’uburwayi.

Ubushinjacyaha bwavugaga ko hagati ya 2015 na 2017 abakekwa banyereje miliyari 2,5 Frw yatanzwe n’abakirisitu ngo hishyurwe umwenda urenga miliyari 3 Frw BRD yari yarahaye ADEPR ngo hubakwe Dove Hotel.

Urukiko Rwisumbuye rwa Gasabo mu Ukuboza 2018 rwagize abere Sibomana Jean na Tom Rwagasana [bari bariyise ba Bishop].

Mbere yuko iki cyemezo gifatwa, ADEPR mu Ukwakira 2017 yambuye ubupasiteri Sibomana Jean na Tom Rwagasana, igikorwa bavuze ko kinyuranye n’amategeko.

Nyuma y’imyaka ibiri bahagaritswe mu kazi, bakanamburwa inshingano z’ubupasiteri, Rev Sibomana yandikiye Inama y’Ubuyobozi ya ADEPR (CA) ayisaba kurenganurwa.

Ni icyemezo yafashe asembuwe no kuba Umuvugizi wungirije wa ADEPR, Rev. Karangwa John na we wagizwe umwere n’urukiko nyuma y’amezi umunani afunzwe kubera gukekwaho inyandiko mpimbano yarasubiye mu kazi.

Mu ibaruwa ye Rev. Sibomana yagize ati “Tumaze kumenya ko ariho asaba guhemberwa icyo gihe cyose yamaze afunzwe no gusaba kuguma mu nshingano z’akazi mu Biro Bikuru bya ADEPR, tubandikiye tubasaba ko icyifuzo cye cyasuzumanwa n’icyacu, tugasubizwa natwe uburenganzira bwacu twavukijwe kuva 2017 dore ko natwe urukiko rwatugize abere nubwo urubanza dutegereje imikirize yarwo.’’

Rev Sibomana yavuze ko ategereje kurenganurwa bidashingiye ku marangamutima kuko abantu bose bareshya mu mategeko.

Ati “Mu rwego rwo guca akarengane, gutonesha n’ubusumbane muri Itorero rya ADEPR, turabasaba guha agaciro iyi nyandiko yacu muyishyira ku byo mufite mu ngingo z’ibyigwa mu nama yanyu iri imbere izasuzuma ikibazo cya Karangwa.’’

Rev Sibomana yabwiye IGIHE ko ariwe wanditse wenyine ntaho bihuriye no guhagararira abo bakoranye muri ADEPR.

Ati “Niba ikibazo afite [Rev Karangwa] gisa n’icyacu, kuki bitafatwa kimwe? Natwe turasaba kurenganurwa. Niserukiye njyenyine, nibyo natekerejeho uwanjye.’’

Abajijwe niba azitabaza izindi nzego mu gihe CA itazasubiza ubusabe bwe, yagize ati “Njye nzakomeza nsenge Imana yanjye.’’

Umuyobozi wa CA, Kayigamba Callixte, yavuze ko iyo baruwa yayakiriye ariko ntacyo yayivugaho.

Ati “Ntiturakora inama ngo tuyigeho. Inama irabanza ikayigaho ikajya yatanga igisubizo. Sinagusubiza icyo inama izanzura kuri iyo baruwa.’’

Rev. Karangwa John nyuma yo gufungurwa yasubiye mu mirimo anahabwa ibigenerwa umukozi birimo imodoka.

Mu mezi umunani yamaze atari mu kazi Rev Karangwa asaba ADEPR miliyoni 28 Frw z’imishahara atahembewe.

Nyuma yo gufungurwa kwe, Umuvugizi wa ADEPR, Rev Karuranga ku wa 23 Nyakanga 2020 yamugiriye inama yo kwandika ibaruwa agaragaza aho yari ari kugira ngo inzego z’itorero zihamenye zinagene ibikurikije amabwiriza itorero rigenderaho n’imicungire y’abakozi baryo.

Icyo amategeko ya ADEPR ateganya ku mukozi wafunzwe

Ubusanzwe ingingo ya 114 mu gika cya 1 y’amategeko ngengamikorere ya ADEPR iteganya ko iyo ukora umurimo w’umunyamuhamagaro utangirwa inshingano akekwaho icyaha cyangwa imyitwarire inyuranyije n’amabwiriza yihariye agenga abakozi b’abanyamuhamagararo y’itorero rya ADEPR ahagarikwa ku nshingano by’agateganyo kugeza igihe ikibazo gifatiwe umwanzuro wa nyuma n ’urwego rubifitiye ububasha.

Ingingo ya 36 y’amategeko yihariye agenga abakozi b’abanyamuhamagaro iteganya ko umukozi ahagarikwa by’agateganyo iyo afunzwe mu gihe kirenze amezi atandatu.

Kugeza ubu, ADEPR yajuririye icyemezo cyo kugira umwere Rev Sibomana mu gihe Ubushinjacyaha nabwo bwajuririye Urukiko rwisumbuye rwa Nyarugenge ku kugira umwere Umuvugizi wungirije wa ADEPR, Rev. Karangwa John, ku byaha yari akurikiranyweho byo gukoresha inyandiko mpimbano.

 

Leave a Reply

Your email address will not be published. Required fields are marked *