Amateka ya Rwabugiri i Nyamasheke ntakwiye gusibangana

Abakiri bato bo mu Karere ka Nyamasheke barasaba ko amateka y’ibigabiro by’Umwami Rwabugiri biherereye mu Mudugudu wa Gikuyu, Akagari ka Ninzi mu Murenge wa Kagano yakongera agasiburwa kugira ngo nabo bayamenye.

Nyamasheke iri mu turere tw’u Rwanda dukungahaye ku byiza nyaburanga birimo Pariki y’Igihugu ya Nyungwe, Ikiyaga cya Kivu, amateka y’abami bahatuye n’abahateguriye ingamba n’ibindi.

Muri ayo mateka harimo ay’Umwami Kigeli IV Rwabugiri bivugwa ko yimye ingoma guhera mu mwaka wa 1853 kugera mu 1895. Mu ngo yari afite hari harimo n’urwo mu Karere ka Nyamasheke.

Abaturage b’i Nyamasheke bagaragaza ko amateka y’ibigabiro by’urugo rw’umwami akwiriye gusiburwa kuko yasibamye, abatayazi cyane cyane abakiri bato ntibayamenye kandi ari amateka yaranze igihugu cyabo.

Kamirindi Théogène yagize ati “Mbere nta byapa byari bihari ariko twarabigaragaje barabizana amateka arandikwa ku buryo yabonekaga, icyo gihe hari nko mu 2018 ndacyeka ariko, urabona ko yasibamye. Ababishinzwe bakwiye kongera bakayasibura abana bato n’urubyiruko rukayamenya.”

Rumwe mu rubyiruko twasanze kuri ibi bigabiro ruvuga ko aya mateka adasomeka neza kandi rufite amatsiko yo kuyamenya, bagasaba inzego zibishinzwe ko yakongera akandikwa neza mu buryo burambye.

Mutesi Jacqueline ati “Urabona ntibigisomeka ariko biragaragara ko iki cyapa cyangijwe n’izuba ndetse n’imvura, ababikora bashatse bakora uburyo aya mateka yakongera kugaragara kandi ntazongere gusibangana vuba.”

Sinumvayabo Uziel na we yagize ati “Usomye ntabwo wasobanukirwa neza kuko urabona ko hari inyuguti zagiye zisibangana, ndifuza ko babyandika mu buryo burambye kandi aho ibihe bigeze aha byashoboka.”

Ntagwabira André ushinzwe Ubushakashatsi ku mateka ashingiye ku Bisigaratongo mu Kigo cy’Ingoro Ndangamurage z’u Rwanda, avuga ko batari bazi aya makuru kuko byari ibyapa bikomeye ariko bateganya kuhasura bakaba bakongera bakabisana.

Ati “Byari ibyapa byiza bikomeye ntabwo twari tuzi ko byashaje, turahera ko tubikoraho kuko ni ibintu byoroshye kandi ni ibintu bisaba amafaranga, amafaranga ya Leta hari inzira acamo ariko turabikoraho byihutirwa.”

Muri aka gace hari ibigabiro mu marembo y’ahahoze urugo rw’Umwami Rwabugili. Byari bine ariko hasigaye bitatu kuko kimwe cyaguye.

 

Leave a Reply

Your email address will not be published. Required fields are marked *