Abacururiza T2000 basabwe kubahiriza amabwiriza yo kwirinda covid 19

Abacururiza mu nyubako izwi nka T2000 iherereye mu Mujyi wa Kigali rwagati, bagaragaje imbogamizi baterwa no kuba basabwa kuba batashye mbere ya saa Moya mu rwego rwo kubahiriza amabwiriza yo kwirinda Coronavirus.

Babisabye kuri iki Cyumweru ubwo Minisitiri w’Ikoranabuhanga na Inovasiyo, Ingabire Paula, yabasuraga agamije kureba uburyo ingamba zo kwirinda Coronavirus zubahirizwa muri iyo nyubako.

Abakorera muri iyi nyubako bagaragarije Minisitiri Ingabire aho bageze bashyira mu bikorwa ingamba zo kwirinda COVID-19 nko gushyira ubukarabiro ku miryango, gupima umuriro ababagana, kubahiriza intera hagati y’umuntu n’undi, kwirinda ubucucike mu nyubako n’ibindi.

Bavuze ko nubwo basabwa gutaha kare, bafite ikibazo cyo kubura imodoka muri gare, saa Kumi n’ebyiri bakabafungiraho.

Umwe mu bacuruzi yagize ati “Iyo tugeze muri gare saa Cyenda kugera mu rugo saa Moya biba ikibazo bitewe no kubura imodoka, ikindi muri uwo muvundo wo gutanguranwa no kugera murugo saa Moya ushobora gutuma ahubwo twanduzanya.”

Nkurunziza Elie yavuze ko banafite ikibazo cyo gufunga kare, mu gihe ayo masaha aribwo abakiliya baba batangiye kuboneka.

Yagize ati “Abakiliya baduteza imbere ni abakorera mu biro, iyo baje saa Kumi basanga twafunze bigatuma natwe dutaha imbokoboko, kandi dukeneye imisoro, kwishyura ubukode bw’inzu. Nimubona bishoboka mugerageze mwongere amasaha turebe ko twabona umusaruro.”

Minisitiri Ingabire Paula yavuze ko kugira ngo isaha ya saa Moya yigizwe inyuma, bizaterwa n’uburyo Abanyarwanda bitwara mu kwirinda icyorezo.

Yasabye abo bacuruzi kuba aba mbere mu kubahiriza ayo mabwiriza kugira ngo icyorezo gicike, ibintu bisubire uko byahoze.

Yagize ati “Gusaba ko isaha ya saa Moya ihinduka twese nitubyifatamo neza tudakoreye ku jisho, ngo niba umuntu akubwiye guhana intera ukumva ko atari inyuga za leta gusa ahubwo ari inyuga zacu twese kuko ejo, ejo bundi umwe muri mwe ashobora kwandura ugasanga hano hose harafunzwe. Icyo gihe mwaba mugize igihombo gikomeye cyane ntibibe bikiri saa moya gusa.”

Kuva mu cyumweru gishize abagize Guverinoma bari kuzenguruka mu masoko atandukanye yo mu Mujyi wa Kigali bagenzura uburyo amabwiriza yo kwirinda Coronavirus ameze, banakebura abo basanze batayubahiriza bikwiye.

 

Leave a Reply

Your email address will not be published. Required fields are marked *